الكابوس السادس
“البغية بالجمعة مش بالمصاري”..
شو أهداف الجمعية!؟ شي بيقلك الهدف بالجمعة.. لانو مش عمنلتقي غير عالمناسبات وحصّا منها يا ربي منعرفش بيوت بعض!! ومنو مندفع مصاري منشان نلتزم.. وشي بقلك منشان نجمع مبلغ محترم.. لان مش عبصرلنا نجمع غير هيك.. والحقيقة والصراحة.. وعن تجربي، لليوم ما لاقيت سبب واحد نقدر نعتمد عليه، بس يلي بعرفو ومتأكدي منو إنو عقد مفي مغريات بالجمعية ضميرك بيطاوعكش تعطل عن الدوام الشهري الخاص فيها.. وعدا عن هيك يعني حارتنا ضيقة ومنعرف بعض كثير منيح، الغايب عنها بيكون بطل السهرة ببرنامج للنشر.. وهون بصفي الغياب تحت عنوان.. لمن يجرؤ فقط!!
بتصفلك هالسيارة قدام الباب. ومدري سيارة مدري شحن عقد ما محملي اغراض.. وبتبلش عملية جاري الشحن.. وزق الغراض كياس كياس وكراتين كراتين.. شي الو حاجي وشي بلا حاجي.. من مأكولات بتغذي اهل الصومال 6 سنين لقدام وكماليات منشان البرستيج يلي ما بيكتمل غير إذا كلف الوحدي منا الشيء الفالاني..
ويتم استكمال التحضيرات الأخيرة بانتظار المعازيم.. وبخة “ماكسيمة” عالأثاث وشمعتين تلاثي بألوان مختلفي وموسيقى عمر فاروق.. وبيندق الباب وبيبلشو يوصلو وحدي ورا الثاني.. ووقفي طويلي قدام الباب عبوس وعبط وسلام وكلام.. تقول الهن عمر مش شايفين بعض.. ولفي طويلي عريضة لاستعراض التحديثات بباقي أركان البيت.. وتعابير من فج وغميق عقولة أحد الأصدقاء عالفيس.. ونظرات شي اعجاب.. شي رضا وشي غيري.. وشي نظرات تندرج تحت منقرف.. هو تحديدا بتوقع بيقربو سنفور غضبان..
وبيوصلو عغرفة “حصريا” والأكثر تطورا الغرفة المنشودي يلي كنا حكينا عنها بحلقة سابقة..
طبعا هون الكل بيوقف مذهول مع صوت موحد ومتقن بأوركسترا عالمية: واااااو..
وبيقعدو بالغرفي بانتظار الوﻻئم…
وبتبلش عمليات نقل المطبخ بأدواتو وفنياتو وأكلاتو الشعبية والمستوردي نحو غرفة العمليات الجراحية التطهيرية بانتظار الأمعاء الخاوية.. لإنو في ناس بتجوع حالها يومين قبل الجمعية.. واني وحدي منهن!! ؛) والله وكيلكن أوقات بضطر افتح زر البنطالون الفوقاني بدون محدا ينتبه.. مش منشان شي بس منشان إقدر آكل أكثر واستمتع بهالنكهات الغريبي العجيبي يلي كنت فكر زمان انها مش موجودي غير بالجني.. ودخل كرمك يا ربي.. إذا بالدنيا هيك! كيف بالآخري!؟
وفجأة بيسكت عمر فاروق… وبتحل محلو أصوات الملاعق والصحون.. ومناداة من زاوية لزاوية..
على شي حطيلي ملعقة تبولي وكباي… وشي حطيلي سلطة يبانية وبوركساي… وشي قطعة بيتسا عزيتون.. وشي سيكاريوت مع روتيف الف آيم.. -بتمنى كون كتبتها صح لانو عطول بلفظها غلط- وكل ها ليش يا حزركن!! لان قررو الصبايا انو بدهنش جمعية مع أكل لانو جايين يشوفو بعض ويستمتعو بالقعدي مش هنن بالغرف وصاحبة البيت بالمطبخ!؟ شو بنا بالحكي تفكيرهن كثير منطقي لانو هي الاشياء اسمها مقبلات.. نقرشات… سلايط.. بس مش أكل!!
بتنتهي مهمة الجرد.. وتعود عملية النقل المعاكس من الغرفة إلى المطبخ..
وبعدها تتم إعادة شحن الغرفة مرة أخرى بكميات هائلة وأنواع فاخرة من حلويات غربية… وشرقية.. محلية.. وصناعة يدوية.. وتورتات وﻻ أطيب وفواكه مجففي وبزورات عأنواعها ونقاريش.. وكثير إشياء غنية عن التعريف.. ومشروب العلاقات الاجتماعية.. رئيس العصابة.. بطل الجلسات النسائية “المتي”..
وبتبلش الصحافي تشتغل والتصوير ثلاثي الابعاد عالفايبر وعالفيس والتويتر مع أغلا ناس.. بين أقواس.. عذمة الراوي..
ومرة ثانية بيبلش مسلسل: حطيلي من ها.. وعبيلي من هذيك… وها شو مبين طيب.. وها يلي هونيك بعدني مذقتوش.. وعلى أممممم مع تغميضة عيون ورفرفة بالايد.. إذا الطعمي نالت الاعجاب… والكل بيصير يتهتفن عنفس النوع.. ليمسحوه عن بكرة أبيه.. أما بالنسبي لصاحب البيت ولولاد.. فما بتوقع يكون الهن علم بهيك أصناف ولا حتى حدا فكر يحطلهن حصة عجنب.. هي نقطة لازم نوقف عندها لان في حال هالطفل لمح هالانواع بالبراد قبل مراح عمدرستو.. ما بتوقع تركيزو بهالوقت بيكون بالدراسي..إلا بيصير يشوف ال9 كورسان.. والمثلث قطعة بيتسا.. واللوح طبق شوكولاطة…
حطو حالكن محلو يا جماعة إي اني لو محلو عملت حالي صاخني وعطلت عن المدرسي..
وبعد ميرتفع السكر عند الصبايا وتنتفخ المعد.. بيلقحو حالهن عالركايات وكل وحدي مهديي بطنها تقول بالشهر السابع من الحمل.. وبتمسك كل وحدي أيفونها أو غلاكسيها.. وتبلش الرسائل واللايكات والتعقيبات وتوزيع الابتسامات للشاشي المتجمدي قبالهن.. ولا وحدي عبتحكي مع الثاني.. وصاحبة البيت قاعدي قبالهن والدخني عبتطلع من أذنيها.. عبتصبلهن متي وتعتني بصحتهن متلها متل كيس المصل مش ناقصها غير إبرة شك حتى تتم عملية الضخ بنجاح..
وفجأة بينتبهو انو داهمهن الوقت والساعة صارت 3:10. وعقد مالقعدي ممتعة.. قصدي الأكل مغري.. ما حسو بالوقت كيف طار.. فبيشقلو حالهن بصعوبة بسبب تراكم الطعام في المعدة وتضخم الأمعاء.. وبيمشو بصعوبي نحو الباب بيركبو سياراتهن وبفلو.. مخلفين وراهن أطلال لقبيلة ولائم.. كان إسمها .. طعام..
يتبع…..
