![](https://jawlany.com/wp-content/uploads/2013/12/italika.jpg)
(سلسلة حلقات خياني مدروسي ونتائج معكوسي)
بعد مكل واحد يفل عبيتو صديقتنا بتبلش غزل بهالبيت متل مكوك الفضا وتركيض من الأوظة للصالون للمطبخ لأوظة لوﻻد.. على تنظيف وتمسيح وترتيب.. وبس تخلص بتجي لعند جوزها بتقلو: معش قادري اتحمل تعبت بدي اطلع دورة ارتاح من الصبح فلاحة…
بيرد جوزها: حبيبتي انتي منتبهة للساعة!؟
بتنرفز متل العادي وبترد: اي شو بعملك اسا بعدني فضيت طقت جوزتي حاسي بدي اختنق.. -وكم كلمي حلوي تحنن قلبو عليها مع اختلاف بنبرة الصوت وتغيير تام بمعاني الوجه- قباري مانت شفتني قديش اتعبت بيحقلي اطلع اتنفس شوي ليش اني لوين عبروح!!!؟ (طبعا هي الأخيري بخط عريض)..
بعد ميسلم أمرو ويلاقي انو فش مجال لتغيير النتيجي من النقاش بيقلها: طيب ولوﻻد!؟
بتصرخ: ليش وﻻدي لحالي!؟ تعلم قعود معهن لحالك شي شوي بلكي صابني شي.. لك بلكي متت.. يا اخي تعرف عليهن بلكي التقيت فيهن شي صدفي عالطريق وما كنت معك.. كيف بدك تعرفهن ويعرفوك..
بيرد بسخرية وبصوت واطي: انتي موتي ومعليكي..
بتمسك شنطتها ومفاتيحها وبتركض متل الفراشي عالسيارة قبل ميغير رأيو.. (عأساس كان إلو رأي بهالطلعة من أصلو)..
بيفتح هالبي التلفزيون متل العادي ليحضر برنامجو المفضل -نشونال جيوغرافيك- بيجي الصغير بقلو: بيي قلو بدوش يلعبني..
البي منسجم ومش مركز: إي يا بيي طيب..
الولد: شو طيب قوم قلو يلعبني..
البي: لا تعليق…
الولد بعد ميعصب وتبلش نوبة البكا عندو: وك يا بيي شو بيك بتظل مسطل عبحكي معك.. خيي بدوش يلعبني.. قوم قلو يلعبني .. ولإنو البي ما عبر الولد بيحس بإهاني ومن قهرو بيضرب بيو بيكس خفيف عكتفو ليعبر عن خيبتو ببيو.. وهون البي بيصحا.. ويا صبحانك يا ربي بتوعى رجولتو.. وبيزأر متل الأسد: عبتضربني يا كلب!!؟
الولد بيتزرزع وبيركض عالأوظة لعند خيو مييت رعبي والبي راكض وراه متل الفهد المنقض عفريستو..
وبيصرخ الطفل من حلاة الروح: دخيلك يا خيي.. بيقفز الخي الكبير بيخبي خيو الصغير وراه وبيوقف بوجه بيو..
وبيبلش فلم التربية والزعيق(والصلا والصوم عليكي يا امهن): شو بعدك مقبور فايق عبتعمل انت واياه.. انقلعو نامو.. مش شايفين الساعة قديش صارت!!
بيرد الصبي الكبير: بيي بعدها 8:00 والآنسة قالتلنا فينا نسهر لل9:00 .. عندك شي مشكلي ثانية!!؟
بيصرخ البي: ولك عبترد جواب بوجهي!!؟ يا كلب يا بلا مربى..؟
الولد: ﻻ يبيي مش عبرد عبشرحلك..
هون بيطلع التورم للألف والبي بيبطل يقدر يتحمل: ولك ولد قد الصرماي عبيكبر حكي ويتجولقني بهالاجوبي!!؟
طلع في ولي حيوين.. اني بس قلك نام بدك تنام مش معلمتك بتقرر واسا بتفوت بتنام انت وخيك وإذا بسمع حسكن بدي إجعل…..طوووووووووط..
بيغلق الباب وراه وبيرجع عالصالون بيشعل سيجارة وبيكفي برنامجو… شوي بيسمع همس جايي من اوظة لوﻻد… فبيتنرفز.. وبيهجم مرة ثاني بيرقهعن كل واحد قتلي حشك ولبك بتلبدهن بالفرشي.. وبيقلهن: يل سمعوني حسكن لشوف.. البطل يفتح بوزو بعد اسا..
وبيركض عالصالون بيمسك تلفونو: ولك تعي خذي وﻻدك تعي ظبيهن عني قرقعولي دماغي… مش قادر طقلك اياهن.. وبيسكت.. يبدو إنو الاتصال انقطع!!
بعد برهة من الزمن بيندق الباب وعالهسي بيمشي صوب الباب ليشوف مين جايي بهيك وقت لإنو ما إلو خلاق يستقبل حدا..بيطلع من العين الساحرة بيلاقي جارتهن الحلوي.. بيركض لقدام المراي بيزبط هنكلو بيرسم ضحكتو ويا صبحانك يا خالقي الغضب تبعو بينجلي جلي من دماغو.. بيفتح الباب قال انو مستغرب: هلا تفضلي..
ببسمي خجولي بترد: هلا بيك.. حكت معي مرتك وعزمتني اكل كاتو.. بس كإنو السيارة مش هون!!؟
– إي طلعت تشتري غرض عالسريع قالتلي مشان تستنييها صارت بتوصل.. يل تفضلي لوﻻد هون لا تقلقي..
-بتبتسم وبتفوت ﻻ تفهمني غلط بس لإنو مش حلوي فوت وانت لحالك..
-لا تقلقي بالعكس بحترم فيكي هالشي و هذا حقك.. شو بتحبي تشربي!!؟
– مو على أساس مرتك جاي منشرب سوا..
– لا حابب اسقيكي شي من ايدي..
– طيب قهوي..
بعد مينصرف الرجل عالمطبخ بتستغل الجارة الموقف وبتتصل لرفيقتها: لك وينك اني عندك صرت؟! …. طيب تتأخريش..
بيجيب القهوي وقطعتين كاتو.. وبيقعد قبال جارتو وهي عمتشرب القهوي.. بس مش مرتاحة.. بيغير المحطة عفلم اجنبي رومانسي ليلطف الجو.. وهي بيبلش الخجل مع الخوف يسيطرو عليها.. وتسائلات.. وأفكار وخطط لتفل.. بيقرب صوبها وبيقلها بصوت دافي وعيون ذبلاني: بتعرفي انو اني من زمان مستني هاللحظة!!؟
بتبلش الجارة ترتجف.. وك بتعرفي انو اني ومرتي منظل نتقاتل بسببك.. كثير بتغار منك عفكرى.. اي معها حق … ولك اني بحبك..
بتنتفض الجارة وبتقلو: ﻻ لحد هون وبس اني بدي فل.. بيوقع الفنجان وبتندلق القهوي عالطاولي.. بتوقف بدها تفل بيوقف بطريقها بيحاول يخضنها ويقلها: وك قليلي بتحبيني دخيلك عبموت بلاكي اني.. بتدفشو عنها عالكنباي بتقلو: بعد من دربي أحسن ملم الجيران عليك.. ومجنوني بعملها.. بتركض عالباب بتفتحو بسرعة متل يلي هربان من حريق وبتركض عالبيت..
وهوي بيبلش يحوص ويلوص.. ليلاقي حل.. ويبدو انو لمعت براسو فكرة لانو ابتسم ابتسامي خبيثي..
بتوصل مرتو عالبيت بتفتح الباب وبتفوت عالصالون.. بتستغرب: وينها جارتنا..
بيرد بفخر : جارتك لحالك.. طلع معك حق.. لك بس لاقتني لحالي حاولت تزبطني.. واني كحتها ومعش بدي اياها تدعس بهذا البيت.. عبتفهمي!؟
بترد المرة وضوء الانتصار عبيلمع بعيونها: شايف كيف!! كنت تظل تقلي هي غير .. واني قلك متلها متل غيرها… ونتقاتل بسببها… منيح يلي عرفتها عحقيقتها..
-أصلا شو بيفوتها عبيت فيو رجال لحالو حتى لو لوﻻد موجودين.. من هون بتبين النية.. أنا عنجد بطلت احترمها.. نزلت من نظري!!!
يتبع…