شاعر الجولان
يا شاعر الجولان ودينا السلام
من بعد ما حل القضى وخلص الكلام
ومن بعد ما عشنا معك دمعة سرور
يا غبن قلبي تدق ساعات الختام
يلي مليت الشعر من فكرك سطور
ياما فضو من الحبر عا إيدك قلام
وتا تفرّغ خوابي المواهب والشعور
حوّلت كل دفاترك كاسة مدام
******
أنت الكتبت كتاب بين ظلمة ونور
لمّا النواعي فلت ورفرف حمام
كنا افتكرنا خلصت دواعي الشرور
لكن يا غبنك بعد ما النور انجلى
ترجع عيونك ترقد بعتم الظلام
يا شاعر الما عشت لحظات الهنا
وعشت الطفولة رماح عسنان القنا
ياما رمالك دهرك بدربك شباك
وقضّيت عمرك بين كوع ومنحنى
من بعد ما خابت أماني مرتجاك
ومن بعد ما ريح الظلم عودك حنى
ومن بعد ما برد الشتي كشّف غطاك
وبقوة حياتك ما حدا فيها اعتنى
ظليّت ناصب للأمل بيدك شراك
وناي التفائل ظل يعزف ميجنا
*****
وبرغم أنو الدهر حرْمك ما عطاك
ظليت فاتح للعطا كفّك طريق
ومين ما احتاج مساعدة تصرخ أنا
يا شاعر الي بقيت سهمك ناصلو
وبين المزح والجد حدّك فاصلو
طلابك الفارض عليهون احترام
بحبون ألك ظليت حقك حاصلو
بسن التقاعد فتت بالعشرين عام
وعليك ظلو يسألو ويتواصلو
لشعر العامودي ظل عندك إلتزام
الباقي علينا تا الطريق نواصلو
بحضن الأبد مرتاح يا سليمان نام
لا تقلق من ضيوف تأنيب الضمير
الجولان منك شعر حقو واصلو
يا قلم اكتب شعرك ويا فكر هات
وعن شاعر الجولان عيد الذكريات
يمكن بصغرو الموج هز سفينتو
ولما نشأ لسفينتو عاد الثبات
الأنسان لولا منبحث بتكوينتو
بتبلش حياتو كلها برحلة شتات
لكن بعد ما العمر يصقل طينتو
عيبي علينا نظل نبكي عالفتات
ويلي بيسألني العقل شو زينتو
بقلو المتلك أنت لمّا نحترم
يلّي بحول محنتو منحة حياة
بمزيد من الحزن وألأسى تلقينا خبر وفاة شاعرنا ومعلمنا المربي الفاضل أبا سليم الذي يملك رصيدا ذاخرا بمكارم ألأخلاق وأسمى القيم صاحب المواقف المشرفه نطلب من الله عز وجل أن يسكنه فسيح الجنان ويلهمنا الصبر والسلوان وانا لله وانا اليه لراجعون