مقبرة مجدل شمس هل هي من مسؤولية المجلس المحلي؟ أم من مسؤوليات الأوقاف؟ أم من مسؤوليتنا جميعا كأبناء بلد؟
جميعنا نزور هذا المكان من فتره إلى أخرى في حالات العزاء والدفن، وسنزوره زيارة أبدية عاجلاً أم أجلاً، وهذا الأمر هو مسؤوليتنا وأولويتنا نحن جميعاً.
هذا المكان بحاجة إلي الرعاية والصيانة بشكل دوري، لأنه يعكس تربيتنا وأخلاقنا جميعا.
الأوساخ تحيط المقبرة من جميع الجهات، ومخلفات الأشجار أيضا تبقى هناك، ومخلفات شبابنا الذين يذهبون إلي هناك في ساعات المساء، ويتركون خلفهم العلب الفارغة والقناني الزجاجية.
على المجلس المحلي تعيين موظف يقوم بتنظيف المكان ورعايته وزراعة الورود، وتنظيف المكان بشكل دائم، أو على لجنة الوقف تبني هذا الأمر ايضا بشكل دائم.
إذا لم يتم هذا حل هذا الأمر بأسرع وقت، فنحن كشباب وأبناء منطقة ملزمون بهذا الأمر.
أتمنى الرد السريع من قبل رئيس المجلس السيد دولان أبو صالح، أو من رؤساء لجان الأوقاف في مجدل شمس، لأننا نملك أكثر من لجنة في بلدة كلها لجان، دون تحريك أي ساكن فيها.
باحترام سليمان هايل سمارة
ه ص
مسؤولية كل اهل البلد مش جهة وحدي مسؤولي لانو كلنا بنا نندفن فيها .
الله يرحم ابو كمال حسن بشير على مجهوده ايام زمان بغرس الاشجار وريها .يجب علينا الاستمرار بعطاء الاولين.
كل خزوق بهذه البلد هو مسئوولية اهل البلد
اخ سليمان مش كل واحد لازم ينظف بيتو وحديقتو خليهن هن الي ساكنين هنيك (الميتين) ينظفو . ولك بلد كلها زعامه منين بدن نجبلها شعب
الله يرحمك يا شيخ ابو كمال قديه كنت تفضل على الميتين
يلا اسا متل العادي كل واحد يبلش ينتقد الثاني …..
الاولى يا شباب نقول يلا من بكرا نطلع انظف وعملو لجنه بلا ما نزت المسؤوليه على حدا لانو المكان للجميع مش ملك شخص معين
الى الأخ سليمان سمارة انا ابن هل بلد وبعرف مين قلبو عليها ومين لا انا بقترح انو ننطلق من انفسنا رجالا ونساء بخدمه هل بلد ونحافظ عليها من كل شر وخلينا نحدد يوم نطلع ننظف ونزرع فيه ونعطي أولادنا حق بالمحافظه على بلدهم بايديهم وما بدنا نشغل بال لجنه الوقف والمجلس خليهن بالمشاريع الكبيرة
نظافه البلد حسب رايي من جميع النواحي….لازم تكون من اهل البلد وماعاد بدنا نعتمد على الافراد نحنا مجتمع واعي شبابنا قد المسؤليه بس بتنقصنا نقطه التوجه حدد يوم ونحنا واولادنا جاهزين
موضوع التربه مسؤليتنا كلنا
وانا بتكفل بصيانة الاشجار والورود
ابتداء من الاسبوع الجاي
شكراً على الطرح سليمان
بخصوص موضوع مقبره مجدل شمس.
إذا لم تقوم أي جهه .. إن كان من قبل الاوقاف او المجلس المحلي بإتمام هذه المهمه على أكمل وجه حتى يوم الخميس القادم .
سوف أقوم بالاعلان للعمل يومي الجمعه والسبت ودعوه الاهالي والشباب والصبايا وأبناء مجدل شمس لأنجاز هذه المهمه.
وهذا اليوم سيكون بمثابه تكريم لذكرى المرحوم سميح محمود وذكرى لمن سبقوه من ابناء مجدل شمس الذين لا يقبلون بهذا الوضع القائم.
وشكرا
الى الأخ سليمان سمارة اذا يالي ببالك على قضيه متل قضيه المخدرات ما اجتمعو والباقي كلنا صرنا عارفينو ما النا غير اهل بلدنا الطيبين وبس