بيقول المثل “السواقة ذوق وأخلاق”, لكن هالحكي ما إلو علاقة بمنطقتنا لا من قريب ولا من بعيد.. والسايق بسيارته كانوا رايح على عملية إنتحارية.. وبس بقدرة قادر بيرجع على بيتو وسيارته صاغ سليم…
طبعا اللي بيزيد الطين بله هو ضيق الطرقات وكثر السيارات اللي واقفي عالجنبين, وبدك تمشي “زيك زاك” حتى ولو ما كان في أيا سيارة جاية قبالك.
هذه القصة بدها مقالة لحالها… قصة انه الناس بيعمرو بيتهن على الطريق وبيحاولو قدر المستطاع ياكلو منه, وبيعتبروها شطارة.. وعأساس بالمخطط في كراج للسيارة تبعون, بس بعدين بأجروه للكراج وبيصفو سيارتهن عالطريق.. وكمان سيارات المستأجر وزباينه.. وشو بدو يوسع ليوسع الطريق!!!
منبدا من الصبح.. بدك تودي ولادك عالمدرسة.. ومش بس انت, كل الأهل بالبلد بدهن يودو ولادهن بنفس الوقت.. وخوذ على زحمة سير.. الله وكيلك بتفكر حالك بتقاطع “شيبويا” (**) بطوكيو.. وما يواخذوني الصبايا.. لأنو أكثر اللي بيكونو عم بيودو ولادن عالصبح هن صبايا.. الوحدة منهن بتفكر حالها بحالة حرب بدها تدز حالها بالزور بين السيارات.. قال شو بتعتبر انها شطاره وقساوة قلب.. وبيصير مفهوم حق الاولوية بخبر كان.. وانت خايفه على سيارتك.. وقلبك قطيع.. وما بيبقالك خيار الا تكتفي الشر وتعطيها الطريق.. وبس بدها توقف وتنزل ولادها بتوقف وين ما بيحلالها.. وبنص الطريق.. وكأنوا ما في حدا هون.. بالبيت بتصيّح ع ولادها.. بس لما بتكون موقفه بنص الطريق ع بتنزل ولادها عالمدرسة بتجيها الحنيّة والرقاوة، وبتصير بدها تبوسهن وتعطيهن نصايح وتقلهن باي.. وبتعرقل حركة السير وبيبلش الزَمير وبتفكر حالك بنيو دلهي (***).. وهي ولا على بالها.. وعلى قلة من مهلها.. وما بتحسب حساب لحدا…
…
بالنهار بتفكر انو حركة السير لازم تخف.. عأساس الناس أغلبها بأشغالها.. بس هالحكي مش صحيح.. والحركة بتضلها بالبلد على ما هي.. صبح وظهر ومسا.. وما بيكفي إنو الطريق بصعوبة بيوسع سيارة وحدة, بتلاقي واحد جاي عالسوق.. على شي محل.. وبيكون في سيارة موقفة قدام هالمحل.. وبيكون لقدام شي 10 متار في محل فاضي يصف سيارته. بس ما بيكلف حاله يوقف السيارة على بعد 10 امتار.. لأ, لازم يوقف السيارة قدام المحل بالضبط.. بس فش محل!! فبيقوم بيوقف السيارة حد السيارة الموقفة.. وبيسكر الطريق.. ومتل إجروا بتمشي الناس ولا عمرها ما تمشي.. مهو الشارع ملك بيو… لك أصلاً في ناس بتوقف السيارة بنص الطريق وحتى ما بيكون في سيارة ثانية موقفه قدام المحل.. يمكن هواية عندهن يوقفو السيارة بنص الطريق ويعطلو حركة السير, أو عندهن خلل بالدماغ.. ما بيستوعبو انه هالشي غلط… لأ, والأنكى إنو بيشغل الغمازة.. يعني بيفكر إنو إذا شغل الغمازة صار مسمحله يوقف وين ما بده.. صارت وقفتو قانونية…
….
بتكون ماشي بسيارتك والطريق مفتوح قدامك.. وعالجنب الثاني من الطريق موقفه سيارة.. وفجأة بتشوف سيارة جايه قبالك من الجنب الثاني.. المسار تبعك مفتوح.. بس المسار الثاني مسكر لأنو في سيارة موقفه.. والي جاي قبالك ما بيستوعب انو مساره مسكر.. يعني حق الأولوية إلك.. يعني حضرة جنابو لا زم يوقف لحتى انت تمرق وبعدين بس يفضى الطريق يمشي.. هذا طبعا لو كان اللي جاي قبالك بني آدم طبيعي.. وما بتشوفو غير طحش عليك وبدك توقف غصبن عنك.. وإلا بيفوت فيك.. وتاع فهمو إنه الحق عليه.. والله مش عارفه هو الجماعة متعلمين سواقة ولا آخذين رخصتهن بالرشوة.. مهو حق الأولوية أبسط الأمور اللي بيتعلمها الإنسان لما يعمل رخصة سواقة!!!
…
وشو بدو يحكي الواحد ليحكي.. بعد ما وصلنا للي ماشية بسيارتها وعبتحكي عالتلفون.. ومش شايفي حدا قبالها.. ولا عن الشب اللي محمل معوا رفقاتو وفاتحين الموسيقى على آخرها وماشي على الدقة ونص.. وبدك تطول بالك وتمشي ورا.. ولا عن الاختيار اللي صار عمره شي مية سنة ومفكر الترك تبعه ليموزين.. بيخزق البلد بالنهار القصير شي 100 مرة.. وهوذه بزمانهن مش سامعين لا بقوانين السير ولا خلافه.. والله وأعلم كيف آخذين رخصة.. وإذا معهن رخصة بالأساس كيف بعدهن بهالعمر سامحينلهن يسوقو.. بتحس الواحد منهن عآخر رمق.. كيف بعده قادر يدعس فرام.. ولا عن اللي مفكرين إن الغمازة بالسيارة إكسسوار.. للزينة.. وبدك تكون نبي لتتنبأ أنه بدو يفرق عالشمال أو عاليمين.. أو بدو يطلع بشكل مفاجئ على الطريق..
هالموضوع معقد وصعب يقدر الواحد يعالجه بمقالة.. بس حبيت فش خلقي.. وبعرف مسبقاً انو لا رح يقدم ولا يأخر.. وهالبلد خربانه ما في إمكانية لتصليحها.. ويمكن أزمة السير والسيارات أقلها.. بس متل ما قلت حبيت فش خلقي وإحكي.. لأني إذا ما حكيت يمكن طق..
_________________________________
* لبيبة – إسم مستعار. الاسم الحقيقي محفوظ لدى موقع “جولاني”
** تقاطع شيبويا: موجود بالعاصمة اليابانية طوكيو, وبيعتبر من أكثر الشوارع ازدحاماً في العالم, بيمرق فيه 2.5 مليون شخص يومياً.
*** تعتبر نيودلهي أكثر المدن بالعالم استخداما لزمّور السيارة
هذه هي الحرية والديموقراطية الذي يتمتع فيها الشعب العربي، لربما الافضل ان نعود الى عصر الا-ميكانيك
بس كنت عبقرا عنجد هلي بشوفني بقول معو انفصام شخصيي عبضحك لحالي ,يا لبيبة الحق معك مليون بالميي بس عرفي شغلي بالمختصر المفيد وبلخص كل الاقوال والمقالات هلي بتعملوها كلو حكي فاضي عند اهل الهضبي ,بإختصار المفيد اهل الهضبي القانون عنا من بانياس ورايح عنشان هيك ريحي حالك وكسري شبابيك احسن فشة خلق من الفش هلي عالفاضي هلي ميخرطش مشط حدا وشكرا (عنجد انو كلماتك حلوي كثير).
بس بحب قلك كل يلي قلتية مزبوط بس نقصتي التركترون يلي مع مرعيش بس حسب راييي الحل الوحيد انو اغلب الطرقان لازم تكون باتجاة واحد ….. عارف جوابك رح تقليلي جربو طريق واحد يعملو باتجاة واحد فصارت فية الزركي اكثر من طريق السوق على كل حال كثير حلو فشت الخلق وبتمنى عطول نشوف هل حكيات ونشاللة بوعدكش بس كثير في امل انو 1 بالمييي يتقيدو بهل شي
الذي تحدثت عنه كله صحيح والغريب في الامر ان هؤلاء جميعا عندما يخرجون خارج الجولان يتغير تصرفهم ويصبحون افضل السائقين ويقودون سياراتهم حسب القانون…..
اني حسب رأي لازم كل شخص يبلش من نفسو.وبلعكس الانسان الواعي والفهمان هوي لبيعطي حق الاولويه وبيحترم القوانين لانو محترم والشخص التافه فش عندو قدره على استواعب الغير لانو مفكر حالو او حالها على راسو ريشي والبلد بلد بيو لخلفو وهوي يا حرام بيبقا منضرو بضحك وهوي طاحش بهطريق وبكوشي شايف كانو حاطت تحتو ركاي
مقال جيد .
أنصح في إضافة رجال الدين وكيفية السياقه التي يتبعونها . فهم يرون ضوء أخضر لا يراه الجاهل !!
بهالمقال عبينحكا عن الذوق والاحترام للشارع وكمان اللي مارق بالشارع اذا انت بتحب انو يتوجهلك اي كلام من رجل دين كمان رجال الدين ما بيحبو يتوجهلن كلام على الذوق بالشارع .بقلك انت بلش التزم بالشارع قبل متحكي عغيرك
الزلمي مغلطش بولا حرف باللي قالو, ولا قلل من احترام حدا ولا قلل ذوق. اللي عبيحكي 100% مزبوط. طبعاً مع الاحترام لرجال الدين او الجهال. الواقع والحقيقة رجال الدين عنا مفكرين حالهن فوق الجاهل طبعاً الحكي بيشملش الكل. بالمختصر حسب رأيهن انو حق الاولوية لرجل الدين قبل الجاهل.
حارتنا ذيقا ومنعرف بعض وها اللي بيصير عنا فا بلا منعمل فيها قلة ذوق واحترام رجال دين عالراس والعين واحترامهن واجب مختلفناش بس بالحق فش رجل دين وجاهل. في مساواة صاحب الحق هو صاحب الاولوية.
حلو كثير بس نسيتي مواتير السكل اني بشتغل بمحل بالساحة وفي واحد شغلتو وعملتو كل يوم عاحلت الصبايا من الثانويه بيطلع من الحاره التحتا ومركب مرعيش للمتور تبعو والله وكيلكون صوت متورو بيوصل للسما مزعج بطريقه مبتنوصفش قلت ذوق وقلت ادب مش معقول
بالرغم من انك نسيتي تذكري …. الازمة وقت البنك , ووقت الاجورا , ويوم الخميس بالليل , بس اني بوافقك على كل الي حكيتي الا شغلة وحدة … انو هالبلد ما بتتصلح .. اذا كل انسان منا بيفكر هيك
بالتأكيد ما رح نصلح شي وما خفي كان اعظم … بس لو كل شخص بينطلق من حالو منرجع متل ما كنا واحسن …. يمكن البعض يقولو اني عايش بعالم خيالي او عبحلم … بس التفكير السلبي بعمرو ما رح يودينا الا للسلب ….. شكرا الك على هالمقالة اللافتة … وبطلب منك تضلي تفشي خلقك … فشاتك حلوة ومفيدة….:)
مقال حلو وفيه مصداقيه بس في ظاهره كثير خطيره وكييييييييييير منتشري وهي يبعثو هودعوت او يتراسلو عالفايبر وهن عبيسوقو وهي اخطر شغلي واني شخصيا تعرضتلا انو كنت بدي اقطع الشارع وبنتي معي والسواق مش شايف الطريق قدامو لان راسو بالبيلفون ولولا رحمة الله ولطفو كان سفنا عنجد ديرو بالكن منيح وارواح الاطفال والناس مش لعبي بايد السواقين او اي شخص
السواقه تربيه بالاصل وبعدين ذوق . شعبنا ما عندو تربيه كلام فكيف بدو يصير عندو تربيه سواقه وحتى المشاه كلها فوضى وهذا ما في داعي نوصل لعصابات التركتورون
يعطيكن العافيه تعبتوا حالكن من الكتابي. لان إذا بتكتب لبكرا فش حدا برد وبيعرفو انو الحكي الهن وبيعملو حالهن مش سامعيين.البلد وبالأحرى كل القرى تعاني من نفس المشكله انشالله يتلاقا حل للفوضى لان الناس بكل شي عبتتقدم إلا بالحفاظ على القانون
مع كل احترامي بس خرجكون اني بحبش لسياسي بس بحب لمنطق لما قالو بدن يفتحو مركز شرطه جماهيري فزيتو لفوق ولتحت وعملتولنا فيها وطنيي وسياسه… لبدي قولو فش نظام فش قوانين ها لبدو يصير ولخير لقدام ظلكون ستنو ليندعسلو شي ولد بلتركتورونات يلي عاملي لبلد حلبة سباق سعتها قولو الو بوليس الحقني … وشكرا
كل الإحترام إلك لبيبه على فشة خلقك لحلوه.بس لاحياة لمن تنادي مع شعبنا لخربان..طيب كلو كوم ولختيار يلي عترك ومرتو راكبه علكرسي ورا وماخذي حجم سيارة شحن ومع هذا مركبين سل كمان…شي بيهوي ومنظر بيموت من لضحك
عفكراعمنحكي عن الذوق والاحترام مش على المصخره عالبشر وعلى ختيار لولا مهو محووج يطلع عالترك ورا مرتو مكنش بيطلع بالبلد واذا بدك بس تبقي تمرقي من حدو بقاي وقفيلو لتودي او تودي مرتو.
بدي قلك انو اغلب الي حكيتو صحيح وكثير عمنشوفو ومنحسو واكيد مش متل مقلت بالاخر انو لا راح يقدم ولا ياخر بالعكس انا وحده من الي ممكن تكون عبتعمل جزء من هالمخالفات وبدي بلش اشتغل عحالي بهالموضوع وشكرا انك عبتلفتلنا انتباهنا
عنجد حكيتي كل شي اني بحكي لرفقاتي واهلي كل يوم وكل يوم بيصير معي قصه جديدي من قلة ذوق بعض السواقين اهم شي الشباب الي عبيراهقوا مع شرب وصوت اغاني ملعلع بكل المجدل بفكر حالو شغلي وبس شوفوني يا ناس يوم الخميس بحاول اطلع من شغلي قديش متاخر منشان ما اعلقكش بعركت السير لا ولاضرب من هيك بس اطلع بيطلعلي واحد ومش من ***** ملعلع اغاني عبيشرب وعبيزقف هو وصحابو وماشي خمسه انجق وبنص الطريق ولا بتقدر تدوبلو ولا بتقدر تزمر لان الوقت متاخر شوي عيب والعبلو بلاضويي مهو مش منبه عبيترقوص بلايخر يا جماعه لا حيات لمن تنادي شعب متصنع وعرب و **** بس عند ليهود بكونو مؤدبين ومذوقين بلسواقه وغير لسواقه
شو مفكرين حالكن بأوربا؟؟؟؟؟؟
كاتب اسم التعليق “Hi” , وعبتقول للعالم شو مفكرين حالكن بأوروبا. مترعرع بشوارع نيو يورك حضرتك لانو. خارج عن الموضوع تعليقي بس حسبي الله ونعم الوكيل بالبعض.
حلو المقال كتير بس منشان الختايره والترك ما حبيتها منك وحتى لو صح … بضلو أهون من الشباب والصبايا وأهون من التراكتورون الي نحنا الكبار منخاف منو فما بالك ولادنا .. حلوي فشة الغل بس للأسف هون بالبلد ما حدا بيمشي عالقانون .. احترامي لك
بدي اتبرعلك بطقم صحون تكسريه وفشي قهرك وكيفي لانو الحكي بهيك موضوع هدر لوقتك
حلو كثير الموضوع المطروح ولازملو حل جذري بكل طرقات الهضبه مش بس بمجدل شمس لان بس الله عبيستر يصير كوم حادث من ورا سواقة المراهقين واللي اغلبهن بدون رخص بس ملاحظة صغيرة في كثير اخطاء إملائية بالنص أرجو منك تصحيحها بالمقالات القادمة والى الامام
بس نسيتي كمان لما يكون في محل وقدامو بتصف 3 سيارات بتجي صبيي حلوي ومعها سياره فخمه بتفكر شو بيجي عبالا بتعمل بتصف محل 3 سيارات ولا كانو في زباين او ناس بدها تصف وعايفي حالها لتلاقي محل وليش هالانانيه زبطي صفتك او صفي بالبيت وتعي مشي عنجد قوانين السير عنا معدومي والناس معدومة الاخلاق بهالموضوع
الحكي كثير حلو ومزبوط مي بل مي
اما بس بدي قول كل واحد قرا المقال انو يبلش من حالو مش بس يطلب من الاخرين يلتزمو هو كانو الحكي مش الو
بس بعد شغلي نسيتي تقوليها انو معبر المشاه هلي مرسوم عاﻻرض هذه مش رسمي بنتصور حدها ما حدا بيكلف خاطرو وبيوقف عليه اما لونهن بشموني عبعد 10 متار بيوقفو اذا في بسي بدها تمرق وشو بدك تحكي تتحكي يرعاكي الله
شو بدك تصلحي بالبلد لتصلحي للاسف معش تسوى غير لقطع غيار تاخرتي والبكى فوق راس الميت بينفعش بتر فلت سموم كحول شباب واعي ما حدا يقلو شو يعمل هو بيعرف شغلو كبيرها خربان وزغيرها ابشع اني بقلك اصحي تفكري غير كيف تديري بالك عحالك وعبيتك اما الباقي فالحل بس بمعجزي صعب تصنعيها
إلى الأخ مش مهم كلامك هو الصح .. مع احترامي الك لبيبه بس ما وقفت عاختيار وعلى تركو .. عكل حال قلتلك ما حبيتها منك هالملاحظه .. لأنو الاختيار مش سكران متل الشباب الزغار وعبيمشي وعالدقه ونص ومع موسيقى عاليي .. ومش عتراكتورون متل الشباب الي ما عندن إحساس .. كلنا منعرف انو الترك الو استعمالاتو المنيحه وانو بيقضي حاجي .. وانتوا قلبتو الموضوع لمسخره من تعليقاتكن .. وكانو نحنا بنا نضل شباب والكل متفضيلنا .. كل الاختياري الي بتشوفوهن بروحو عارضاتن وبيتعبو .. ولولا هالترك كان بينقال فيهن القيل .. فش ولد متفضي لاهلو .. ومنجي نحنا اخر شي منتمسخر لأنو نحنا بصحتنا
عنجد انو هيك لسواقه ذوق واخلاق يعني متل مفي عنا بالهضبه بتلاقي **** جاي مسفح عالتركترون …..شي بيقرف قرفان *****
نسيتو ومع الأسف كثير كثير شغلاة الي رايحا تودي ولادها يعني كل ولادها بما فيهن الصغير الي بحضنها وعمتحكي عل بلفون وبلا قشاط ملتهيي بل بلفون ومش شايفي لا قداما ولا وراها وبتوقف بنص الشارع وبس تزمرلا بتقلك ولو دقيقه مهي عندى كل الوقت ابنها الصغير بحضنها وكل العيلي ورى
عنجد يا جماعه الي بيشوف نفسو غير قادر على اتخاذ القرارات والاصطفاف بشكل صحيح اثناء تجوله في سيارته الي مقسطها عالبنك .
ميسقش …
والي بيشوف انو ابنو مش ذات احتياجات خاصه وبيقدر يرجع من المدرسه على البيت مشيا على الاقدام . مفش حاجي يروح يجيبو .
والى الدودم اصدقائنا . البنزين غالي ومستقبلكن اهم .
والى الاصدقاء الاحباء الي معاجبتهن وحدي عجنب الطريق .. روح حكي معها وفكك من ربنا ..
عزيزي سائق الاسعاف ” التيبول نمراتس ” والانسان الي عبيموت .
عادي معن بدهن يحشكو للصبايا بدك تطول بالك انت واهل الفقيد .
عزيزتي الداله .. الاحصائيه تقول ان هنالك سياره لكل فرد .
ها اجمل تعليق.
بتربح معنا ترك جندير TDI