“عزيمتك وعزيمته ضيعولي عزيمتي”

تعليقات

1. حلو كثير وها وضعنا اليوم وحسب رأيي اللي ناوي يجي عالعرس وبيجي بلا عزيمه لانو جد يعطيعهن العافي العزامة والبلد كبيره

2. ووشو الفكره من هالحكي ؟؟؟

   1. الفكرة اننا نعرض حدث اجتماعي.. لنلاقي حل جماعي.. ليلي شايفين في مشكلي..

3. ﻻزم كل الناس تشارك بعضها باﻻفراح بس بدون نقوط وهلي بدو يجوز ابنه ويطعمنا كباي على حسابنا بدناش نشاركه مناكل الكباي ببيتنا اربحلنا من هالنقوط وعدا عن الشوفات هلي ما بتنطاق من الصبايا المزلطه وشباب الهيبز.اسفي على هيك بلد صارت اﻻعراس فيها صفقات تجاريه والتعري صار تطور.

4. كل شي انذكر صح ميي بلميي اني شخصياً عبعيش هالحالي كل يوم وبالاخير بروح متل الشاطره عالواجب

5. اني بغالط كل الحكي المكتوب فوق, لانو بتوقعش في شخص عنا بروح ععرس بس ليأدي واجب او لانو مجبور.
   كل شخص عنا بيعرف اذا كان العرس بخصو أو لا وحسبها بقرر اذا بدو يروح أو لا, بالاضافه لانو كل شخص فينا أكيد رايح عالعرس لينبسط بفرح غيرو ويشارك معو ومعندوش أي مشكله يسكر مصلحتو او يترك شفلو.

6. واني بقترح تصير لعزيمي عامي وبلا كتابت الاسم على ظهر لكرت لانو هيك هيك كثير عبينعزمو ناس بلا منعرفهون
   وهيك ما حدا بيعتب على حدا بيكون كلو نعزم وبلا ميقولو اهل لبيت بعضهون كتبو اسم لبي بلا لشباب وكتبو اسم الام كمين بلا ميكتبو لصبايا فا بيروحوش لشباب والصبايا لان مش مخصصينلون كرت الهن ومش ذكرين اسمون على قفا الكرت

7. حلوه كثير المقاله .وعنجد هذا يلي صاير عنا .والافضل نرجع لأيام زمان نعزم على المكرفون هيك الكل بينعزم ومحداش عندو حجه انو موصلوش كرت عزيمه واللي ناوي يروح يأدي واجب بيروح لان كل البلد نعزمت نفس العزيمه مش تخصيص لفلان وفلان وشكرا الك كثير لانك عبتحكي الواقع الموجود عنا ……

   1. يا جماعه كل الاحترام لا مشايخنا بس الحق الكبير عليهم هن عملوا الحساسيه تبع العزيمة ليزم الكرت يجي بس باسمهم وهن لمين بيخترلون بيرحوا بس بعد مره في الله فوق عز وجل شيف وقاشع وشكرا

      1. شو خص المشايخ كل مدق الكوز بالجره بتقولو المشايخ شو الهون علاقه بها الشغلي روح لوين بدك مخدا ماسكك ولا بس متلاقوش حل بتزت الشغلي علمشايخ عيب عليك

      2. ودخلك المشاكل بغزه الحق على المشايخ فيها مش هيك اني من عندي ستحى على حالك وتزتش همومك على الناس عندك مشاكل حلها وما تحط الحق على حدا

      3. شوو خص المشايخ بهالموضووع
         بدك تحكي حكيلك شي منطقي مش بس يﻻ تسفيط حكي !!!!!

8. كثير صح هيك صاير بهالبلد

9. طبعا نحنا ولاد بلد وكل يوم عبنبعد عن بعض اكثر واكثر … عالاقل هالشي يجمعنا …
   الواجب شي حلو مش بشع راح يجي يوم وتحتاج كمان انت للناس تجي لعندك .. خلينا محافظين عهالشي لانو شي بيضرش بلعكس

   1. *** يا سيد ايتاليكا ما حدا جابر حدا على المشاركه بس المشاركه حلوي ونحنا منعرف انو في كل الوقت مشاكل بالعزيمه وهلي بحب يشارك فيه يشارك بلا عزيمه

10. الموضوع بيجنن… مع انو فيكون تكفوو وتزيدوو عليي وصقلا ايمتا متصير الموضااا اهل العريس واهلا العروس المقربين فقط وبلا هالتكليف وهالبهورا الزايدي لان في نااس معهيش تاكول ومش عبتجوز وليدا لان في تكليف زيادي عن اللزوم ولبهوراا مش حلوي ……!!!!!!!!

11. حسب رأيي انو ممكن موقع جولاني او اي موقع ثاني يعمل صفحة مطورة للأعراس الي كل يوم بيومو بحط أسماء العرسان وبيدعي الجميع بصورة جميلة او مكرفون الي كل الناس تسمع وكل انسان بيعرف واجبو وبيشتغل بأصلو وذوقو .اليوم فش حدا مش عبفوت عالمواقع الالكترونية ومش عبيعرف كل الاخبار يعني الكل راح يشوف العزيمة بس لازم يكون في عريس شجاع ليبادر هيك مبادره ويبلش فيها ويقضي على هالعادي , فكروا بالمستقبل القريب الي بدها تصير الهضبي مدينة كبيري وببطل في امكانية لهيك عزيمي الي اليوم نحنا عمنشتغل فيها .

12. كل الاحترام لكل الناس بس بدي قلك شغلي أنوا بعد في فقير وغني الله الغني في ناس بتحب تضرب وجه اذا ما كانت معزومي بتروح بلا عزيمي لأنوا وضعوا ميصور وبعد شغل في ناس بس بتروح لتشوف هذا شو طابخ وجيب طباخ وياي وياي ما أطيب أكلوا لأنوا وضعوا منيح اما يا شحاري الفقير قديش بدو يسمع حكي وبلاخر ما بيحضر حدا الله كبير شيف كل شي وشكرا

13. كل الحكي مزبوط, والناس عبتتذايق من حالها قبل الغير.. اني حاولت انو غير, بس كالعادة بيطلعولك القراب منك سنجق عرض وكأنو انت بدكش الناس تجي لعندك.. او اذا برحش بكنش صاحب واجب.
    بتمنى انو كل واحد فينا يبلش من نفسو لنقدر نحدث تغيير يلي الكل بدو اياه, بس ما حدا مسترجي يكون المبادر بالشي..

14. ١٠٠ % صحيح هذا هلي عبيصير بكل عرس …كثير حلو كل الاحترام .وعندك ناس بتروح على عرس القاعه بتآكل وبتشرب بديها وبجريها وثاني يوم بتقلك لك شو ها الأكل كان بيقرف .بيدورو عالشغلات الصغيري والتافهه بس حيلا يحكو(ودور فتش بيكونو منقطين ٥٠. شيكل بالقاعة)..

15. اليوم كلو بيسجل عدفتر اذا اجا وما اجا وساعتها بيقرر اذا بيروح وناس معها حق انو تسال حالها بروح ولا ما بروح لمن ناس بتمرق بتقلك مرحبا وانو كيفك ومنيح وبالمقابل بيمرقو بيقلوش مرحبا ها اذا شافونا لان بيمرقو بعملو حالهن وين وين وبس يصير في واجب بيبعثولك كرت انو مرات بنروح على عين الاهل ومستحا بس من انو يقولو ما اجاش لعنا الاجتماعيات معش متل قبل اليوم يلي بشوفني بعين بشوفو بالثنتين متل ما بيقول المثل ومنقلش عن عبث لان عبصير

16. صح ميي بل ميي هيك صاير معنا شي طبيعي بس يكونو ناس مبنيين على عادات سيئه بصير لواحد بس بدو يعمل شغلي زغيري بلاقيها مش زابطه معو لان مش عارف لنتقاد منين راح ينزل عليه علشين هيك يعمل كل واحد يلي بريحو بلاقي مناسب معو ولناس صعب كثير ترضيها بلاخر بيطلعو على حالن مش رضينين لانو ماعاد في رضا عند لناس كلها

17. والله اني معك قلباوقالبا. كثير هلحكي مزبوط بس انو يتغير شي بهلمجتع صعب جدا.

18. كل الاحترام!

19. الموضوع مهم للكل واكيد فش حدا منا الا مواجه هلشي ، بلنسبي للعزيمي مثلا ببقعاثا صرلنا سنتين او اكثر بنعزم بلمايكروفون وبس الخصوصي كرت … اما كمان الاحسن ينعزم بس مايكروفون للكل خصوصي وعمومي وحتى انو صارت بعرس ***** **** والاغلب قبل الفكرة … وبالاخر مبروك للعرسان الجداد وعقبتها للعاوزين والمشاركي ابدا مش غلط وهي لا بقيمة النقوط ولا بلكبب هذا حق اجتماعي علكل واتذكروا ايد وحدي بتزقفش .

20. بعد التحية والإعجاب والتحفظ على جزء من مقالتك، عندي تعليق صغير هلي بيخجل من اسمو بلا ما يفرض علينا نقرا لحدا ما منعرفوا ، أبسط شي لنعرف هل كاتب المقال ينقل واقع أو يتهكم على واقعنا، يا ترى كاتب المقال من أي فئة..من الفئات المطروحة..
    شكرُا لكاتب/ة المقال أتمنى أن لا تأخذ/ي كلامي من موقع العدو أو الناقد .. فقط مهتم..!

    1. شكرا كثير لتعليقك.. وبحترم وجهة نظرك شو مكانت.. بالنسبي للاسم المستعار.. انت عايش بمجتمع بينسب كل شي بتكتبو لشخصك.. من دون مينتبه للموضوع وللنقاط المطروحة بالموضوع.. مع العلم أنو أي موضوع بطرحو بيمسني قبل أي شخص آخر.. وهوي طرح لتطوير ذاتي قبل غيري..

21. كلام جميل بين الصد والرد وبين التردد والتقبل … حقيقة واقعة في حياتنا … ومن يقل بأنها غير موجودة كمن يحجب الشمس بإصبعه ويقول بأن العتمة في كل مكان.
    حبيييت اللهجة العامية وكلمة يأنتك حالو مهمة جدا لكثار بدن انتكة لداخليتن قبل مظهرن

22. الكلام صح 100% … بس ها الموضوع كلنا منعرفوا
    وانو نلت ونعجن عالفاضي والملان ونقول انو في مشكلي مش محرزي
    اذا فش اقتراحات لحلول فعالي…
    يعني الي بيقترح حل المنادى بالمكرفون اني شبه متأكد انو هو نفس الشخص الي بينتقد المنادى للاجوره
    والي بيقلك موقع عالانترنت يعملنا مركز لبيي وبيو يعلمهن يفوتو عهالمواقع ويستخدموها
    والي مفكر انو العرس لياكل كباي عحسابو (النقوط) يجي ياكل 4 وبلا مينقط والاحسن بيكون بلا حضورو وبلا نقوطو والكبب بيوصلو لعندو عالبيت
    وقصت اللبس ً….. الاواعي نفسها ملت منها وانتو بعدكن مملتوش!!!….
    وبالاخر نحنا شعب يا فاضي يا متفضي مش قادر حدد بالضبط بس لننتقد عيوبنا وعيوب غيرنا بلا منلاقي حل او بديل …
    واني اولكن لاختصر عهلي بدو ينظر عليي ….

    1. يعني الي بيشاركني بايا مناسبة بتصير عندي رح شاركوا حتی لو ما عزمني وكل عمرها الدنيا قرضة ووفا ونحنا منعرف انو من عاداتنا النقوط بالاعراس وبالاخر هو مساعدة للعريس ليخفف من ديون العرس الله لا يحرم حدا من الفرح ….اني ضد شغلة وحدة بالاعراس هي البوفيهات الي عمتنعمل وكلها حسب رأي زيادة كنا قبل نبرم بصنية المشمش والعجوة ونوعين بسكوت وكبب اسا ماشالله البوفيه صرنا نتفرج ونستحرم نمد ايدنا علی شي لانو كلو عبيركض ورا المنظر ومين عمل بوفيه اجمل واكبر …ونشالله بيتهنوا العرسان

23. يا عمي هون مش انو عن نقوط وعرس قديش بكلف
    في شغلي ليوم عبتصير انو وقت عرس كل اسعار بتصير
    مرتين ، عروس بدى تزبط شعرا ٣٠٠٠ شكل
    بدلي ٥٠٠٠ شكيل ،كل شي غالي ، انا بحسو انو هذا استغلالي ، بنطال يلي حقو ٢٠٠ وبصير ٤٠٠ لانو عريس ، يا اخي ما بصير هلغا ، لازم ندعم بعض مش
    نكلخ بعض ، وردي للعروس بدل ١٠٠ بصير ٢٠٠
    في ناس بطلت تتزوج لاجل هيك مصاريف ، يعمي
    ارجمونا ، كلا مزوادت وبهورا وكذب ، وخاصتا ****
    سعر تبعو مرتين ،،،،،،،

24. يعطيك العافي فعلا موضوعي ومحير هالكلام من فتره كانت العزيمي على مكبرات الصوت ومشت هالطريقه فتره بربع ساعه بتعزم كل اهل البلد وبدون ما تلبك العزامي نهار كامل تركيض وشنططه وفش حدا بيقلك ما وصلتني عزيمه نشالله ترجه هالطريقه وبالنهاي يلي حابر يشاركك بيجي ويلي ما بتعنيلو شي ما رح يجي عادي
    اما قضية النقوط الدنيا قرضه ووفى مش غلط تدعم صحاب العرس بنقوط رمزي بيسند مشروعهن شوي وبكرا رح تلاقي مين يدعمك بس تصير عنجك مناسبه وبحصه بتسند خابه
    هذا رايي المتواضه ونشالله ايامكن كلها افراح

25. يا شباب ويا صبايا فش اجمل من لفرح نشاللة كلكن بتفرحو لحبايبكن وتحسو بمحبة الناس يلي مشاركتكن وعبتساعدكن

26. برأيي الفرح الحقيقي لما يكون حولنا الأحباء والمقربين فقط … وما في سبب ولا داعي تنعزم البلد كلها (( دخلكون شو هالمشاركه هل بدو الواحد يفكر فيها ويحتار لهيك كل الي وصفتهن بالمقال فش الهن لزوم وبلا ما نغلب العزامه ولا يفلسوا العريس وأهله من الشغل المصاريف … بس بدنا ناس جريئه “” مش باللبس “” جريئه باحداث تغيير معظمنا نتوق اليه به نتحرر من القيود الاجتماعية المهتريه (( عيب/ شو بدك يقولوا عنا / يا جرصتنا … الخ )) يلا شباب مين قال اناااا

    1. اني مستعدي اني وخطيبي كمان نعمل هيك شي ونقرر انو بناش يحضر بعرسنا غير لمقربين وبناش نكبر ومنحكي ومنحكي كثير بس لما نجي نستشير علقليلي اهلينا بهيك موضوع اول كلمي راح يقلولنا ياها..كل حياتي واني اديي واجب بلعروسي عشان الناس تأديي بواجبها عندي وكل لنقوط الي نقطو عند الناس مين بدو يردلي يا..اكيدددد راح يحكو هيك منشان ها السبب فش عريس ولا عروس بيتجرؤو عها لشي وثاني سبب والي هو بايخ بس حدا يعمل هيك بلبلد بتصير الناس تقول عنو يا اما بخيل وبدوش يعزم حدا يا اما فقير ومعوش يا اما مش محبوب ومحدا بدو يحضر عندو…بعد بنا شي خمسين سني لحتا نصير نفهم بعض ومش راح نفهم بعض

    2. بيقدي انو بهالبلد العلاقات عبتخف معﻻشي اذا جتمعو بهالافرااح حلوي وﻻد بلدك تفرح لفرحتك او تحزن عحزنك وحلوي نوقف حد بعض
       وﻻ بدكن تنلغى الاجتماعيات بين بعض ويصفي كل حدا بعالم لحال

27. يا جماعه ولكن شو بكنن كلنا بلد وحدي واخوي ولازم وضروري نشارك بعض ونفرح لبعض وبالاخص بهالفتره الي الحياة عبيتبعد الناس عن بعض لانو الي بتتعب بعرسو او بتجي على عرسو بشفلك هي قد الدنيا وبالمقابل يوم فرحك رح يكون جنبك ويشاركك وبتمنى منوقفش عند شغلات صغيره ونكفي كيف نحنا لانو كلنا بحاجه لبعض ولله يديم الفرح عند كل الناس ومنشفش ضيم عحدا

28. يا صديقه لم نفهم المغزى طبعا” اذا كان هناك مغزى!!!!!هذا العرض منيح على كاس مته نرجوا التابع القيمه

29. كثيررر حلو هذة موضوع لانو يوم صبيي بتعرفيها او ما بتعرفيها بتعزمك بتحتاري اذا بدك تروحي اي او لا

30. ملك

31. يا اللة يا ايتاليكا حطيتي ايدك عالجرح عالوجع قرأتي افكاري ومشاكلي كلها بخصوص هذة الظاهرة من خلال طرحك للموضوع اني بجد عايش هذة الحالة ومضايقتني كثير وصايبني متل يلي بالع الموس ويلي واتصرفت متل ما تفكيري بيقول وويلي واتصرفت متل ما هالمجتمع بدو….. اني بحييكي واعجبت جدا بطريقة تعبيرك

32. دخلك شو مع العشا في نيي يعملوا نقل وإلا مش من مستو أهل الهضبة يشفقو على هالمشحرين العرسان

33. اني بقول لازم الواحد يحدد العزيمي بهالايامات في ناس وضعها بيسمحش تروح على كل عرس ومش مجبوره ولي بيجي كرت على البيت بطلع بقول ها العريس ليش عزمني اول مره بسمع في وما بعرفو بيسمك الكرت وبزتو ولعرس قاعه منشان اني عبي القاعه شو خص باقي الناس الي ما الها علاقة فيك لتعزمها وتغطي اجار القاعه وبعدين بروحو وما بيعرفو اهل العريس والعروس كمان فش لزوم وفي ناس بتحب البروزه كل واحد ينطلق من بيتو يعزم هلي بيعرف بيجي يادي عندو واجب ومجبور يعزمو اما انك تعزم ٢٠٠٠بيت بالمجدل ما عدا باقي القرى ها اسمو غلط كل هلي عبصير

    1. يعمي منجي منا نعزم عدد محدد ومنقول مناش نعزم غير عدد قليل..وبس تجي لناس الي نعزمت وتحضر عند لعريس فش دقيقا بيطلع عليي حكي انو مفش عندو حدا يعني مش محبوب..وبيببش حكي لبشر منشان هيك عنجد صعب لواحد يرضي لبشر عنا ان عزم كثير بقولو بهورة وبس بدو نقوط وان قلل العزيمي وخفف الناس بعرسو بقولو مش محبوب فش عندو حدا شو لحل لكان؟؟

34. المقال حلو وبيعكس الواقع عنا…حسب رأيي لازم نظل نشارك بعضنا بالافراح وبالاحزان .بس المشكلة عنا المزاودات بكل شي .. الضيفة عنا كثير مبالغ فيها مش شرط يكون تلاثين نوع بسكوت وتلاثين نوع فواكه ..هذا غير الكبب والسنابيس بكل انواعها.. يلي رايح يأدي واجب مش رايح مخور من بيته من اول ما يوصل بدو يظل ياكل من كل الانواع.. يعني صارت قيمة الانسان عنا تقاس بكمية الضيافة ؟؟

35. اني بحسب رأيي كل واحد يعزم اللي عزمو وعملو قيمه وبس وفش حاجي يكبر العزيمه لأنو وصلنا لوضع بيمرق علينا يوم بيكون في ثلاث او اربع عروسي وانت بتكون بدك تشارك فيهن وهات لعند مين بدك تروح ولعند مين بدكش تروح ومش بس هيك بتجي لآخر الشهر فش معك ولا نكلي ليه لأنو الشهريه راحت على النقوط ،

36. الموضوع في قمة الاهميه المشاركه في الافراح او الاطراح عاده متوارثه من السلف والخلف ولا نستطيع ان نخفف من اهميتها
    لاننا مجتمع صغير فيجب ان نقف ونشارك بعضنا البعض
    هناك شيْين يمكن الاستغناءعنهما العشاء ويستبدل في (نقليه)
    والعزيمة الكرتات والتعب الشاق على اصحاب العرس والعزامين تستبدل في (سياره مع مكبر تجول في الحارات )
    فكم من الشواقل نوفر على هذا العريس المسكين
    (ملاحظه يمكن ان نصل الى هذا الحل عندما نفكر اننا كلنا اولاد تسعه سواسيه كاسنان المشط وليس على وتر هذا ابن عاءله عزيمته خص نص او فلان كان معها او ما معه

37. اول شي مسا الخير. بالنسبة للعزيمة ليش ما تكون علم من اول الاسبوع على كل موقع من مواقع البلد والمنطقة وهيك كل واحد بيعرف واجبو.بالنسبة للنقوط بحبش نتداول فيها شغلي زغيري ورخيصة (قصتنا مش ماديي ).
    لكن اسلوب العمل مش موجود لكبر راسنا ولخوفنا من الانتقاد وكيف اني بدي غير شغلي قديمي واالكل بيتعاملا .
    يا اخوان الكون كلو تغير. بالمختصر لما صرنا مقتنعين انو العرس مش على الشارع وانو الطباخ احسن واهون واكبر قيمي .وجود القاعة حل كثير امور ، اولا يوم العرس مش شرط جمعة او سبت ﻷنو الناس قاعدي ويكون باليوم اكثر من عرس وممكن على مدار كل ايام الاسبوع وبسيعا متأخري نظرا لوجود القاعة، بكون الشخص حول على مهلو وتغسل ورتاح وبقي عندو يروح يصهر او يأدي واجب.شو رأيكن؟

38. مسا الخير يا اخوان بس بدي ذكركن انو الموضوع بدو جرئه حتى يصير التغيير ومتل ما التغت تقريبا أعراس الشارع الخطبه والعقد الي كانت تنعزم عليه الناس كلها كمان كل الأمور اللي فيها مزاوده منقدر نلغيها حق العرسان يكون عرسهن مثل ما يحلموا مش متل التيار حتى ولو كان غلط ومجرد ما نقول رايح أدي واجب ع العرس معناها انو المشاركة سطحيه وهالفرح ما بيعنيلي لهيك لشو كل هالصرعه والي بيقول أني مسلف وبدي الناس تنقطني رأيي مش رح يفرقو كثير عن قيمه تكلفه العرس اذا الواحد بدو يعزم المنطقة والعرس مش עסקה شو منطلع منها (( مش لازم ينحرم العرسان وأهلن من شي بهالفرح بس خليها ع المختصر … بعدين من ناحية العلاقات الاجتماعية نحنا عنا كثير مناسبات الي بتجمعنا وبتأكيد غيرتنا ع بعض لان بكل مصاب مؤلم يتلاقينا أيد وحدة …. بعتذر طولت عليكن بس الأفكار ومحاور مناقشه الموضوع كثيره وصعب طرحها كلها كتابة ….. ״״ بدها قعدة متي ههههه “””

التعليقات مغلقة.