خياني مدروسي ونتائج معكوسي
سلسلة مواقف تنشر على حلقات
الكابوس الثاني:
بيرجع هالرجال من شغلو تعبان وهلكان.. بيلاقي لوﻻد عبيلعبو عالكمبيوتر بالصالون وعميركضو ورا بعض.. نط عالكنباي.. اقفز عالطاولي وانت تخبالي بالخزاني.. وهوب استناول الطابي ويم… انكسرت المزهريه!!! وهروووووب سريع.
وكالعاده زعيق الام واصل للسما.. اني كم مرة بدي احكي… وبالحقيقة بكنش حكي بيكون تهديد ثلاثي الابعاد.. عقولة احد المعقبين بالحلقة السابقة.. وبالصدفه بتكون المزهريه يلي انكسرت هي نفسها المزهرية يلي الأم عاملي حصار حواليها.. فبيصير التهديد أشبه بتنفيذ خطة عسكرية تجاه أعداء بيمسو بأمن البيت الداخلي، وبيتحول البيت لمعركه غير عادله بين رئيس أركان الجيش المدعوم والشعب البسيط المجرد من أي وسيلة دفاع.. وخوذ على سفق ولبط وضرب وحشك ولبك وشبق بأي شي ممكن يتواجد بقرب ساحة المعركة، حتى لو كان ضمن قائمة الحصار، بالإضافة لاستعمال مصطلحات غريبه عجيبه بتخترعها الام بساعة الساعة وبتطلع معها نتقات فنية.. بتوجع أكثر من آليات التعذيب نفسها..
وبترجع الأم تكفي شغلها منتصرة.، ومع هيك بتظل تلت وتعجن بالقصة ل…….. تنام..
بيرد الزلمي: طيب نقلي هالكمبيوتر عغرفة الوﻻد وريحينا، حاجي كل يوم معيشتينا هالسيناريو..
بترد الام: أصلا انت ها يلي شاطر في بتنسا حالك لما تكون عبتحضر مباريات أو برنامجك المفضل كيف بتحول البيت لمنطقة عسكرية مغلقة حركيا وحسيا.. وبتعرف أني هيك عبقول كمان.. قوم لننقلو سوا… بترتاح انت وبرتاح اني من لعب لولاد ومحنهن.. ومن قتالاتنا الدايمي بطعمي وبلا طعمي..
بينقلو الكمبيوتر واصواتهن واصلي لاخر الحارة.. على -كلو من دلعتك وغنجك.. -ولا محزرتش هذا كلو من ﻻ مبالاتك بالوضع وهروبك وعدم مسؤوليتك تجاه الولاد.. أصلا كل الوقت عبربي لحالي وانت وﻻ سألان ولا بتعرف شي..
ومن كلمه لكلمه بيحتد النقاش بيفتح هالزلمي الباب وبيفل من البيت… الحل التكتيكي بأغلب العائلات “الهروب ثلثين المراجل”.
ومن كثر الضرب الوﻻد ما عاد شي حت فيهن.. طلعوا الاهل وسكرو الباب وراهن من هون.. والوﻻد تابعو مسلسل المحن من هون..
-شايف.. مش قلتلك رح ترجعلنا الكمبيوتر..
-يوبي..
-يلا فتحلنا عموقعنا المفضل..
-لا استنا لينامو اسا بترجع تحرمنا منو..
– مش سامعهن عبيتقاتلو!! فتاح قباري فتاح مش فاضين النا بيكونو.. اسا امي بتتصل لرفيقتها لتجي تمسحلها دمعتها وبيي الله اعلم اي ساعة رح يحول.. يعني نحنا ما حدا منتبهلنا أصلا..
-قولتك نحنا السبب!!؟
-ﻻ حبيبي نحنا ما النا علاقة.. هن كل ميتقاتلو بيلزقوها فينا.. بس الصبر اوجب.. لنشوف اخرتها معهن..
-الموقع لا بديش اني خايف..
-طيب فتاح التلفزيون على شي فلم كرتون لنتعلم شي اسلوب قتال جديد نستعملو مع الوﻻد بالمدرسه عبين متنام امك..
وبعدها لكل حادث حديث…
يتبع…
