من فترة بلشت أكتب سلسلة حلقات.. “خيانة مدروسي ونتائج معكوسي” , وكان هدفي من البداي سلط الضوء على تصرفاتنا الخاطئة يلي عمنمارسها كل يوم بحقنا وحق وﻻدنا وحق المجتمع يلي عايشين في , من دون أي شعور بالذنب ومن دون أي إدراك لفظاعة الشي.. وطبعا كنت استنا تعقيباتكن.. وكنت حابي لاقي بين هالتعقيبات تعقيب واحد يشفيلي غليلي ويخطلي بكم كلمة وحسب رأيو الخاص الأسباب يلي وصلتنا لهون.. بس صراحة ما حدا فشلي غلي.. لهيك قررت كفي مشواري الفني 🙂 وخطلكن الأسباب يلي أني بشوفها منطقية.. بس طبعا فش شي مثبت بوزارة الصحة لحد إسا.. مش عارفي شو خص وزارة الصحة بس هيك سبحان الله اجت علساني فكتبتها..
المهم يا أصدقائي الحلوين من خبرتي بالحياة , ومن طعم الوجع ومن الخذلان يلي استلقيتو مني , توصلت لكم فكرة بين أقواس (فز لكي) .. حابي شاركن فيهن..
الوضع المادي!!
لا تستغربو… الوضع المادي قادر يتحكم بأعصابنا.. بمزاجنا.. بضحكتنا.. لك حتى بأثر على نفسيتنا وصحتنا.. سألوني كيف!!؟
متطلبات الحياة اليوم كثيري.. وغلاء المعيشي بارتفاع مستمر.. إن طلع الدولار بيرتفع … وان نزل الدولار بيرتفع.. ما عندو كبير يوقفو عند حدو.. ونحنا يا منركض يا منروح دعس تحت اجرين الراكضين ورا لقمة هالعيش..
وكلنا الحمدلله منشتغل وما شالله وكان عننا.. لانو منحب الرفاهية , ولنقدر نعيش بالمستوى يلي بيليق فينا وبيمتعنا وبيكفينا , بس أكيد ما بيشبعنا .. لازم نفيق من قبل الضو ونشتغل ساعات إضافية.. لك حتى أيام العطل لغيناها… طب اني معكم , حلو كثير الاصرار والعزيمي , بس الشي يلي غايب عن تفكيرنا هوي انو جسمنا بحاجي ليوم راحة لحتى يستمد طاقتو.. واﻻ بيصير يصرف الطاقة الموجودي فيو وبيستبدلها بعصبية ونرفزي وغضب ما الو طعمي , غير زيادة عدد الأعداء والمحبطين.. بسبب الضغوطات المتراكمي بلا منفس..
يعني لا تواخذوني بهالكلمي! الدكاترة يلي عملت دراسات عمدار السنوات الماضية.. واعتمدت عإحصائيات وتعبت حالها لتريحنا وقررت بعد أبحاث عديدي ومديدي , انو لازم ننام 8 ساعات ونشتغل 8 ساعات بس باليوم.. ولازملنا يوم عطلي عالأقل.. ولازملنا ترفيه ومدري شو كمان (بديش اطلع عن الفكرة المركزية لان اسم الله عليي ما بسدق لإنطلق).. شو كان الله حاوجهن يتعبو حالهن مدامنا شعب بيعرف مصلحتو وما بتعنيه دراسات ولا ابحاث وبيمشي الكون عإحساسو وحدسو يلي بأغلب الأيام بيخيب!؟ والا نحنا متل غوغل منعرف كل شي..(إﻻ كيف نصنع سعادتنا).. !؟
طب لما الحل قدامنا وبلا مصاري.. لشو كل هالتعب فهموني!؟
وعدا عن هيك قريت بكتاب انو في نسبة نسيت قديش , بس انو لا تقل عن 80% من الأشخاص بيشتغلو وظيفي بحبوهيش , بس لمجرد انهن بحاجي لوظيفي ولمرتب اخر الشهر.. بيفوتو عالشغل عالعمياني مشان المرتب وبيشتغلو من قفا إيدهن لإنو بالأساس هذا مش شغلهن…
عدا عن انو صاحب الشغل كمان المهم بدو عامل يشيل عنو أعباء الشغل.. يعني ما بيكلف خاطرو بيعمل اجتماع ليشرح للعمال واجبيتهن وحقوقهن ليحمي حالو بنهاية كل شهر من نق العمال ومتطلباتهن.. ويوقف العمال عند حدهن..
وكثير أسباب.. بس حبيت إذكر أهمها.. لشوف في تفاعل معي لكفيلكن…يما متل كل مرة؟!!
بدي ضبضب رحالي وروح.. تعقيباتكن بتقرر..
بكل صراحة..حسيت انو لساني هو الي عميحكي..كل شي كتبتي عبعيشو ومنطقي وعبصير بحياتي..لو سمحتي تتكريش لموقع وكملي كتابي لانو حتا لو لكل اجا ضدك تاكدي انو في ناس بتدعمك واولهون اني.. حكيك كثير بيعجبني بتمنى تكملي من كل قلبي..( الناس الي بتكتب تعليق ضدك هي الناس الي بتقويكي مش لازم تضعفك)بتمنى ينقبل التعليق
صديقتي في كثير شغلات بتمرق بحياتنا وبتحيرنا وبتخلينا نسأل حالنا اذا نحنا عنجد سعداء بحياتنا وبشغلنا واذا نحنا راضيين عن أنفسنا ومن هون بيبدأ التغيير ومنبدأ نحسن بحالنا ونحط خطط جديدة لاهدافنا وطموحاتنا ..
وأذا نحنا مش مبسوطين بشغلنا فنحنا مش راح نقدر نعطي غير اللي مطلوب منا واهم شغلة نحب شغلنا لنقدر نعطي من قلبنا.
ولازم نحنا نعيش سعادتنا كل يوم ..وما نتوقع السعاده بس بتحقيق هدفنا
عنجد معك حق ميه بالميه كل واحد يطلع بحالو ويحاول يبلش من حالو اني كنت هيك بس بدي اشتغل وبدي مصاري بس هالشي سببلي عصبيه كثيره ومعش قدرت سيطر على حالي فقررت ارتاح وطنش وهالشي ساعدني كثير واني اسا متغيرة 360 درجه
كتابه رائعه تحاكي واقعنا
انت تتكلمين ما يعيه ويفهمه كل شخص مناولكن يا صديقتي انه التيار الجارف في مجتمعنافاصبحنا نعرف الخطا ونقترفه بحجة (ماكل الناس هيك) لقد خفت صوت الحق وعلا صوت الباطل
ففي المدارس مثلا ترين مزاودات ومظاهر ليس من المفترض وجودها في مؤسسة تربويه
في العيادات الطبيه ترين من لا يلتزم بالنظام ويصرخ ويسب يكتفون شره ويدخلونه اولا
في الخلوه ترين قرارات غريبه
انها مجرد امثله تريكي بان الواعين المدركين في مجتمعنا جالسين جانبا والذين يعتقدون نفسهم واعين هم يديرون الامور
لذلك اصبحت الامور خارجه عن سيطرتنا
اكتبي اكتبي (فشة خلق)
كل الاحترام عم تحكي واقع قرانا الجوﻻنيه . بس في نقطه حابب علق عليها احنا منحب البسط ولحفﻻت ورحلات ومنخذ كل قرض اهم من الثاني من شين نرفه عن نفسنا وبس يجي وقت الدفع منبدا نركض . وبس لما يمرض عنا ولد ما منلاقي ثمن الرشته لنصرفها اخ لو منصرف ع قد ما منطلع ونخبي شوي ل حسرات اليالي
عنجد انك يا ايتاليكا بتمسكي الوجع كثير واقعي حكيك وبيوصل عقلب كل واحد منا لاننا كلنا موجوعين من قساوة الحياة اللي بيتعب مش عبلاقي والي كل وقتو شغل ومش فاضي لولادو بتلاقي بيتو خربان وهو راكض ليعيشهن احلى عيشه على طول كتبي بلكي هالقلوب بتصفى شوي وكل واحد بيرجع لنفسو وبيستيقظ قبل فوات الاوان………
طرح جميل لكن الأفكار مُستهلكه،وما حسيت انو في عمق أو حلول للمشكله…برغم سطحية الطرح بحيي الكاتب لأنو بيطرح قضايا بنعيشها كلنا.