سفرية بتطيير العقل
إيتاليكا - (اسم مستعار. الاسم الحقيقي محفوظ لموقع جولاني)
26\09\2008
- شو امتا متسهّل عالاردن..
- بكرة اذا الله راد
- أي عال الله يسهل عليك
- تسلم
- وشو كل هالغراض، اخذهن معك!! شو فش أكل وأواعي بالاردن لحتى محمل كل هالشناتي -
والصناديق؟!!
- شايف هي الشنتي الصغيرة
- أي!!
- أي قباري هي الي بس
- اف والبواقي لمين؟
- هي الكبيري لبيت خالتي بعثتلهن هيي ستي فيها شوية أواعي،" بتعرف سقعة كثير بالشام
وفش اواعي.."
- اه خالتك جاي؟
- لا قباري هيي مش جاي بس بدي ابعثلها هي مع شي سواق تكسي.. احلى متموت من البرد..
وهي الصندوقة فيها شوية باذنجان ولبني وعدس وحمص واهم شي خبز كمان ستي استنغصت
لبنتها تاكل من شغل ايدها..
- أي مش غلط
- وهي صندوقة تفاح كمان الها
- والبواقي لمين؟
- يا سيدي هي الحمرة لبنت خال بنت عمي عبتتعلم بالشام فيها شوية غراض ما فتحتها ولا
بعرف شو فيها..
- بس طلاب الشام ما الهن شهر راحو معقول لحقت تحتاج...
- وأنا شو بعرفني قلهن الهن هالحكي!! المهم يا سيدي والشنتين الزرق لناس من حارة
الشرقيي عرفو انو اني مسافر عالاردن وطلبو مني وصللهن هالشنتي لابنهن يلي تزوج هنيك..
- والله مش قليل..
- شو بدك تعمل قباري مظطر تساير الناس..ووحدي لبيت جد مرت ابن خال بيي.. ووحدي لبيت
موفق ووحدي لبيت محمد ووحدي لجارنا ووحدي لواحد ناطق خال مرت ابن جيرانا ووحدي....
- وك خلص صرعتلي راسي.. وكيف بدك تحملهن..؟
- ما بعرف عبفكر استاجر سيارة كبيري تاخذني اني وهن..
- الله يكون بعونك..
*************
- مرحبا.
- لك اهلين وسهلين..
- امتا جيت؟
- مبارح بالليل
- اي الحمدلله عالسلامي، وشو طمني كيف كانت سفرتك؟
- لك بتجنن... بتاخذ العقل..
- حكيلي
- تاع نشرب فنجان قهوي وبحكيلك لإنو حكي طويييييييييييل...
- يل
- هذا يا سيدي مشيتلك من هون الساعة 4ونص الصبحيات، لانو محسوبك.. بحب كون قبل
العجقة مشان امرق دغري
- أي..
- لك شو أي لك 6 بالضبط كنت بالتفتيش..وستي ونص كنت طالع بالتكسي ومتجه ععمان..
- أي كثير منيح معناها ما لبكوك بالمعبر
- لا بالمرة بس انا وصلت 6 الصبح وما مشيت للـ 6 ونص المسا يا شاطر..
- اف ليش شو عامل؟
- ولا شي!! بس محسوبك محمل أكل لجبهة.. ولو حرب مو هيك والا اواعي لك فكروني رايح
تاجر بالثياب. وخوذ على فوتي من هون وطلعة من هون وساعة ياخذوني لعند مدير القسم
وساعة يتصلو بالداخليي وساعة يفتحو الشناتي ويبلشولك بهالاسئلة..
- اف لهالدرجي..
- لك أي ومدري مين باعث كتب بشنتي من الشناتي، وساعتها خوذ عتفتيش بهالكتب وعلى
تحقيق.. مين رايح تشوف وشو الك غرض بالزيارة لمين محمل هالغراض ومين بتعرف هنيك؟
واسئلة ما الها طعمي.. وبالف يا ويلاه لحتى تركوني امرق..
- لك له له له على هالخبريي..
- هذا غير الجمرك يلي دفعتو بالرجعة..
- اف وعلى شو؟
- لك مو الجماعة يلي بالبلد متفقين مع الجماعة يلي بالشام انو شنتي مقابيل شنتي؟!!!
- كمان..
- لك أي، ما بكفي تعبت وانا زقزق فيهن وشقشلهن من محل لمحل بالروحة، كمان عملولي
نفس القصة بالرجعة.. لك وحياة الله انسكر ظهري لك ظليت يومين بالاوتيل نايم
ويجيبولي الاكل لعندي..
- يا مسكين على هالعلقة..
- أي والله أي ووين هالشناتي؟ انا لو محلك ما بعطي ولا واحد شنتو لحتى يدفعلي اجاري
شو انا مجبور..
- لك سكوت مو وصلت من السفر من هون وما لحقت ضويت الضو لصارو واحد ورا التاني يجو
ياخذو شناتيهن. ما عدا وحدي بعدها ما اجت لحد اسا..
- أي مبيين عليها بتفهم بالاصول.. تركتك لترتاح..
- أي كثر خيرها والله..
- لو شو هالصوت سامع؟
- أي سامع دقة الباب وكإنو صوت قتال..
- أي ولو قوم فتاح لنشوف مين؟
- اهلين يا خالة تفضلي..
- لك هيك يا منظوم هيك..!!
- الي هالحكي ؟
- أي الك لكان لجدي؟ لك بنبعث معك غراض لقرايبنا بالشام بتقوم ما بتوصلهن؟
- لك انتي شو عمتحكي؟
- أي يا حرامي.. لعبة عينك عالغراض بس مو الحق عليك الحق عليي بعث معك وامنلك..
- لك يا خالتي عن أي غراض عبتحكي؟
- أي غشّم حالك، لك اسا تلفنولي من الشام وقالولي انو راحو شافو الشوفير وقلهن انو
ما الهن غراض معو..
- بلكي الشوفير سرقهن؟
- لا الشوفير رفيقهن من زمان ودايما منبعثلهن غراض معو بس انت هي اول مرة منجربك
اكيد انت سرقتها وبدك تطالعها اسا قبل مافضحك بالبلد..
- وك شو جنيتي انتي؟
- لا ما جنيت بس منيح يلي عرفناك عحقيقتك اصلا اني بدي فل اسا بس رايحة لعند بييك
خلي يعرف يربيك يا حرامي..
- امنتو بالله على هالنهار
- وك ولا يهمك صاحبي لا ترد عليها..
- وك شوف هالوقاحة، فوق مالواحد تعبان وعايف حالو ومحمل للبشر غراض ما الو علاقة
فيها، لك بيطلع بسواد الوجه معهن..
- طول بالك.............
**********
بعد سني
- شو وينك يا زلمي.. الي كم يوم عبتلفنلك وتلفونك خارج التغطيي
- كنت بالاردن اليوم وصلت..
- بلاقيك ما جبتلي سيري، زعلان مني شي؟
- لا قباري اما البلد بدها ناس دجالين لحتى يقدرو يعيشو..
- كيف يعني؟
- يعني لازم تشتغل بسريي تامي وما تخلي حدا يعرف عنك شي حتى لو بدك تظطر تكذب..
الناس عنا ما بتفهم غير هيك..
وما بخبي عليك يا صاحبي هي اول مرة بنبسط هيك..
- أي انشالله على طول يا رب
*************
- كيفك امي؟
- زعلاني منك يا قباري..
- اف ليش يا قلبي، شو عامل ؟
- هيك بتروح عالاردن وما بتقلي؟
- وانتي شو عرفك؟
- خالتك قالتلي
- وخالتي شو عرفها؟
- قال شافك زوجها هنيك
- أي طيب وشو بدها يعني؟
- كانت بدها تبعث شوية غراض لبنتها يلي بالشام..
- أي مانتي قلتي زوجها شافني بالاردن كانت بعثت الغراض معو..
- وك يا قلبي مانت بتعرف زوج خالتك ما اعسرو ما قبل ياخذ معو شي..
- اسا بالمنطق امي.. لما زوج خالتي ما اخذ الغراض لبنتو المفروض اني أخذلها هن؟
- يا قباري بتكسب حسني
- ابديش هالحسني خلص عيد، شو لازم الواحد يجيب طقية اخفا ليحرك براحتو جوات وبرات
البلد يعني؟
والله العظيم شغلي، شي بطقق الخلق وبتسألو ليش هالشباب عبتطفش من البلد؟!!
