أزمة سير
زهرة نيسان (اسم مستعار. الاسم الحقيقي محفوظ لموقع جولاني)
عبودي مش قادر ينام، في فكرة شاغلتلو بالو! وقاعد عبيناقش مع حالو:
200 دولار بالشهر، وأنا عندي 3.. يعني 600 دولار بالشهر، ضرب 12 شهر بيطلعو يا أبو
العبد 7200 دولار بالسنة!!
عنجد هذول بفكولي زنقتي.. لك بدل مإشتغل أنا الشهر كلو متل الحمار، بصير بقدر اقعد
يوم يومين إرتاح فيهن، لك والله تعبت، لإيمتا بدي ظل على هالحالي أنا؟
لك أصلا إذا صرلي شي لا سمح الله هلولاد كيف منكان بيعيشو من أجار هالمحلات، أحلا
من الذل.
بس وين بدي روح بالسيارة والترك والطرنبي وهالكم غرض أنا؟
لك شو ذاق فيهن الطريق؟ لك كلهن مأجرين كراجاتهن وعبيسترزقو من وراهن، وقفت عليي
يعني؟
الترك والسيارة بصفهن عالطريق، مهو الطريق للجميع وأنا من الجميع، بعدين اسا سيارتي
بدها تضييق عالطريق وتعمل أزمة سير؟ مكلهن عبصفو.. بعدين هالازمي فيي وبلايي موجوده
ليش لحتى ما صف؟ بعدين مش احلا ميجي حدا ثاني يصف؟ أنا احق واحد وإلي سويه بهالعالم.
يا الله يا عبودي لو تزبط معك بتصير بتقدر بظرف سنتين تشتري شفعة للولاد، ولازم
تكون مع جنب الطريق مشان يستغلو الكراجات هن كمان.
لك يا الله كمان شي 3 كراجات والله بيصير وضعي فوق الريح..
والله وعبودي ما كذب خبر، بظرف شهر كان مزبط الكراجات ومأجرهن وكان مبسوط بحالو
كثير، والأحلى من هيك انو لما طلب 250 دولار ما قالو لا، لإنو موقع الكراجات كثير
منيح بعجقة هالسوق..
وبعد كم من شهر جاب تلفزيون ال سي دي، غير طقم الكنبايات، وعمل إضافي (توسيفت)
للبيت واسا عبالو يجدد السيارة..
فجأة وهوي غرقان بأفكارو.. إجا الولد عبيلاهث ويقلو: بيي لحق حالك في واحد ضرب
السيارة وهرب.
صرخ عبودي في وقلو: لك بدي إفهم، من بين كل هالسيارات ما لاقو غير سيارتي؟!!
شو بنا عبودي، هي ضريبة الطمع قباري.
إذا كل واحد بدو يفكر ويعمل متلك، بيصير الطريق الرئيسي منتزه (تييلت) بس للمشاة!!!
أصلا بتعرف عبودي يا ريت تصير منتزه (تييلت)، لك كنت بفتح كشك أنا كمان!! شو لان
بيتي مش عجنب الطرق
ما بيطلعلي استرزق يعني؟!!
