لقاء بين طفل من لبنان وجنوبه وطفل من غزه
وضواحيها
رايه فخرالدين - 17\01\2009
احمد : مرحبا
شادي : هلا
احمد : من وين انت ؟
شادي : لبناني ، انت؟
احمد : من غزه .
شادي : اه سمعت عنها شفت ما احلا القنابل الي بتضوي
احمد :اي اسمها قنابل فسفوريه ، اي كيفنا عليها بتعمل دخان كثير بس حرقت الولاد عنا
بالحاره عبد وطارق ومحمد وحمزه شكلها بتوجع كانوا عبيبكوا كثير منها بس حمزه ما
نوجعش كان اقوى واحد فينا ولا كلمه حكا حتى ما كنش عبيتنفس .بس انت شو عرفك فيها ؟
شادي : ما نحنا كمان كان عنا منها وكان عنا قنابل عنقوديه كمان بس عنا كل الولاد
كانوا متل حمزه ابطال لانهون ولا بكيو ولا شي واهلي قالولي هيك يعني ماتوا . شو
يعني ماتوا ؟
احمد : ماتوا يعني ما عش فيك تلعب معهون ولا بيروحوا عالمدرسه نيالون معش بيروحوا
عالمدرسي .بس انت شو عبتعمل هون بالبحر .
شادي : اني وامي وخيي بالبحر النا من تموز قبل سنتين طلعنا من البيت بيي لانو مات
ونحنا هربنا خفنا . انت شو عبتعمل هون بالبحر .
احمد : سمعنا الاسرائيليين عبينادوا علينا بالمايكروفون كانوا حد البيت " اطلع من
البيت ، اطلع من البيت " اخذوا بيي معهون واختي الصغيره قتلوها تركناها هونيك
بالبيت . ونحنا هربنا .
شادي : ووين رحتوا ؟
احمد : رحنا على مدرسه كان عليها علم ازرق قالولنا هون بتكونوا مناح لانوا هيذي
للاونروا .
شادي : اي
احمد : اي بس قصفوها وماتت امي .
شادي : وبعدين .
احمد : ولا شي قالولنا لازم نطلع من المدرسه لانها مش آمنه . ورحنا شمال ورحنا يمين
ووين ما نروح كانوا الاسرائيليين وين ما كان ومعهون دبابات كثير كبيره وطيران وكل
شي وقالولنا تجربوش تروحوا على رفح لانو حتى اذا نحنا مرقناكون المصريين بيمرقوكنش
الا اذا بتموتوا لانون بحبوا الولاد الصغار وهن ميتين وكان رامي صاحبي يقلي يا ريت
بنموت عشان يمرقونا المصريين . وظلينا نمشي بالطريق الوحيد الي كان مفتوح مشينا
مشينا مشينا وصلنا للشط ما كانش في غيرو طريق وبلشنا نسبح ونمشي بالبحر . وكان في
سفينه كمان بالبحر كنا نشوفها عطول لما كان بيي ياخذنا عالشط نسبح وبعدين سمعنا
انها قتلت هدى غاليه لما كانت عبتسبح وبيي ما عش اخذنا نسبح بعدها . بس استغربت لما
وصلنا لحد السفينه ما قتلوناش قالولنا شاطرين هيك لازم يعملو كل اهل غزه .
شادي : وليش انت لحالك اسا .
احمد : لانو كل الناس الي هربنا معهون عند السفينه اتفرقوا واني رحت باتجاه مصر بس
ما خلونيش فوت لعندهون رجعت من نفس الطريق والتقيت برامي واهلو راجعين من جهة لبنان
من عندكون بس ما خلوهنش يفوتوا واني كملت طريقي رحت على سوريا كمان كحتوني وصلت
ورحت عالسعوديه قالولي جاي تسرق نفط ؟ وكحتوني .
شادي: ليش عهو البلاد رحت .
احمد : لانون بيحكوا عربي بعرف اتفاهم معهون بس هن ما فهموش عليي .
شادي: طيب .
احمد: ولا شي يمكن روح على تركيا .
شادي طيب بروح معك .
احمد : استنى
شادي : شايف شو ها الي بعرض البحر .
احمد : شكلها سفينه ,
شادي : مكتوب عليها بالاسباني استنى شوي لتقرب فا فان فانز فانزو فانزوي فانزويلا .
احمد : فانزويلا ؟!
شادي : اي هي دوله عربيه بعثتلنا سفينه .
احمد : حلو المهم بيحكوا عربي عشان نقهم عليهون .
وصلت السفينه بعد فتره" شادي واحمد جينا ناخذكون" .
احمد وشادي اتفاجأوا لانو الكابتن كان عبيحكي معهون اسباني وهن عبيحكوا عربي بس
ثنينهون فاهمين على بعض .
