معاناة رجل متزوج..
ايتاليكا - 01\09\2010
بيكون الواحد فينا ساهي لاهي.. لا وراه ولا قدامو.. عايش مبسوط وبكل بساطة وروح رياضيي.. بيفيق ساعة اللي بدو وبينام ساعة اللي بدو وبيجن إمتا ما خطر ببالو..
وإلا فجأة بيقوم بينضرب عراسو وبيحب.. وبعد الحب بيتزوج.. ويا ريتو ما تزوج.
بيحوّل من شغلو عالبيت.. بيفتح هالباب وبدو يفوت عبيتو..عفوا ( عبيت مرتو) وما بيحس وبيدرا غير صوت بيصرخ من جوا : شلاح برا..
ومتل الطفل الصغير بيشلح من اجرو برا وبيجرب يدعس عالبلاط النظيف.. بيرجع بيسمع صرخة: ما تدعس بقلشينك..بينتق هالقلشين من اجرو وبيزتو بهالزاوي ومن كثر التعب بيجرب هالمسكين يرتكي عالكنباي.. اي ما بيشوف غير مرتو هاجمي عليه وعبتقلو: لك لا اسا بتوسخ الكنباي قوم تحمم وغير اواعيك، بعدين القلشين محلو بسل الغسيل مش بزاوية اللوان..
بيجرب هالرجال يعمل حالو مش سامع.. بس شو!!! بتقوم الحرب وما بتقعد. ولإنو تعبان ومو جاي عبالو يعيّط بيقوم متل العريس بيتحمم وبيلبس اواعي نظاف وبيرتكي عالكنباي بهدوء وقبل متغمض عينو بشوي بيصرخ في الصوت نفسو قوم.. بيطلع هالزلمي متفاجئ وبيتكرر الصوت أما بقوي وبعصبيي أكثر: عبقلك قوم.. بيقوم هالمسكين ليشوف شو صاير!! بتمسكو مرتو من إيدو وبتجرو عالحمام وبتقلو: قحط الحمام ونشفو ولا تنسا تمسح الحنفيات احلا ميكلسو والمراي روقها.. ورتب علب الشامبو محلهن .. ورجاع نام براحتك.. وبينفذ هالمسكين من تم ساكت.. لإنو إذا ناقشها فات بقتالي إلها اول ما إلها آخر.
وبيطير النعس من عيونو.. فبيمسك هالمخشير ليغيير المحطة عالتلفزيون.. بيلاقي الصوت نفسو عميصرخ فيو: لا تغيير عمتابع المسلسل.. وبيحط هالمخشير من إيد وبيسكت..
بعد شوي بيقلها: وين العشا؟ بتقلو بهدوء: يل حبيبي العشا جاهز تعا.. بيقلها: جيبي العشا لهون، عبالي اتعشا بالصالون.. بتقلو لا حبيبي ما بيصير.. اسا بتذرذر عالأرض وبيجوينا النمل.. هون بالمطبخ أحسن وأنظف..
بيقوم عالمطبخ بياكل بيقلها: الاكل مالح.. بتقلو: أنا هيك بحبو.. بيقلها: شايطين.. بتقلو: إذا مو عاجبك لا تاكل.. بيقلها: يسلمو ايديكي شو طيبين. بتقلو: لا تتمسخر..
بعدين بيحتار شو يحكي بيقوم بيسكت.. بتقلو: شو؟!! مو عاجبك أكلي؟ ليش ساكت؟ وحلها انكنك فيك تحل..
بيقلها: حبيبتي وين الكولا؟ بتقلو: ما بيصير تشرب مع الاكل بيقلها غصيت.. بتقلو: وإذا مش صحي .. بيقوم عن الأكل بتقلو : لوين؟ ما لحقت تشبع.. بيسكت وبياخذ كاسة العصير - لانو ما في كولا.. هي ما بتحب الكولا وبتجيبو عالبيت- وبيطلع عالصالون بدو يدخن سيجارة وتروق أعصابك. بتقلو: طلاع دخن برا عالبرندة.. اسا بتصير ريحة البيت بشعة .. بيضب علبة الدخان وبيصير يدخن من أذانيه..
بيجي بدو يريح راسو وينام بتقلو: لوين؟ شو كل مرة بدي اسهر لحالي؟ بيسهر معها وبيحضر مسلسلها يلي صارت شايفتو شي ست سبع مرات وهي تحكيلو عن البطل والبطلي وعن القصة يلي هوي بالاساس ما بيهمو يعرفهن.. وبتقلب بهالمحطات ولا كإنو موجود.ز وهوي ملزم يقعد حدها.. حرام أحسن ما تسهر لحالها.. بيجي عبالو يطلع دورة صغيري ويشرب قنينة بيرا بالسيارة بتقلو بهدوء: حبيبي معلي روح معك ذاقت خلاقي من قعدة البيت... بيقلها وهوي عمبيحاول يكون هادي: اي اكيد حبيبتي. بتقلو: طيب يل جلي الجليات عبين مجهز حالي.. بيقلها: ليش قديه بدك وقت؟ بتقلو: ثواني. وبتغبلها شي ساعتين، بيجلي هوي الجليات وبيقعد يستنا فيها وعقد مبيستنا بينام..بتجي هي عالصالون وبتلاقيه نايم.. بتقلبها زعلي وكنك زلمي راضيها..
بيطلعو الدورة وهي مبوزمي.. على لا تروح من هون ومروق من هون ولا تسرع ولا تدخن لان الدخان بيضايقني ولا تشرب بيرا انا ما بحب ريحتها وغير هالغناي ما حلوي وهيييييك ليرجع عالبيت..
بيجي شي يوم عبال هالرجال يطلع يسهر معها هوي بيجهز حالو بعشر دقايق وبيستناها شي ساعتين تلاثي وبتطلع في هيك وبتقلو: لك شو ها يلي لابسو؟!!! ما حلو غيرهن.. بيقلها: بس انا مرتاح فيهن. بتقلو: لا حبيبي مو حلوين غيرهن بسرعة لا تأخرنا!!!
بيقلها: مبيني بتجنني حياتي. بتبتسم بسمتها الساحري وبيذوب محسوبك فيها.. بيقرب ليبوسها بتقلو: لا حبيبي اسا بتخربلي ماكياجي.. بيبتسم هالرجال بسمي ساخري وبيمشي..
بتقلو: مييل نشتري هديي..بيقلها: ليش شو المناسبي؟ بتقلو: هيك ما في مناسبي أنا ما بحب فوت ايدي فاضيي لعند حدا.. بيقلها: بس أنا ورفيقي ما في بيناتنا هالرسميات.. بتقلو وإذا!! أنا بدي آخد معي شي..
وكلو كوم وبس يجي وقت النوم كوم تاني بيكون ما جاييه نوم وحابب يحضر فلم اجنبي.. اما هي نعساني .. بتقلو: حبيبي نوص الصوت عالاخر .. بيقلها: حبيبتي مش سامع شي.. بتقلو : واذا أصلا الفلم اجنبي قرا الترجمي بتفهم.. وانت المطيع الهادي .. بس بتهز براسك وبتنفذ.. ويا ويلك اذا بتروح تحضر بالصالون.. بيكون الغضب نزل عليك..
أما إذا هيي مو جاييها نوم وهوي نعسان وتعبان من الشغل.. فبتلعلع هالصوت وبتحضر مسلسلها المفضل .. بيقلها بهدوء: حبيبي نوصي الصوت بدي نام.. بترد: ما بقدر كيف بدي افهم؟ وبيحاول ينام ويتقلب من جنب لجنب وهي بالها بمسلسلها ولا مهتمي في ولا شايلتو من اورضو..
واخر الشي بتجي بتقلك هالمرا:
انت متغيير كثير.. صاير عصبي .. ما بقيت تحبني.. صاير سكوتي..
لك انا بس بدي افهم بيكون الواحد فينا حر.. بيفوت عبيتو ركزو معي عكلمة بيتو..بيدعس بسباط الشغل عالبلاط.. بيشلح بالمطبخ.. بياكل بغرفة النوم.. بيدخن بالحمام.. بينام بالصالون.. بيروح بيجي وين بدو.. وما حدا بيحد من حريتو.. يعني شو كان ضاربو على قلبو وخلاه يتزوج آه؟