معاناة إمرأة متزوجة..
إيتاليكا - 25\10\2010
بتتزوج الوحده منا لكثير أسباب.. أسباب واضحة وأسباب مخبايه.. اسباب منعرفها وأسباب
أخرى نحنا أنفسنا مش مستوعبينها أو يمكن ما منقدر نعترف فيها.. المهم انو منعيش
منشان بالاخر نوصل لنفس الطريق يلي الكل بدو يوصلوو وهوي الزواج.. حتى لو انكرناه.
بعد زواجي بفترة صغيره كثير.. ويمكن يوم زواجي واجهني هالشعور- ما عدت متذكري
بالضبط – إكتشفت قديش أني تسرعت.. وانو كل الفترة اللي مضت ما كان عندي وقت عيد
حساباتي وفكر منيح.. وبلشت نكش بالماضي والحاضر وبلشت دور عسبب اقنع فيه حالي انو
في شي تغيير..
هوي في شي تغيير عالاكيد بس هالشي بيكون صغير ومع تخيلاتنا ومع حاجاتنا لإلو منضخمو
ومنعمل منو مشكلة.
بتسهري كل السهرة مع هالرجال وهوي حاطت راسو بهالتلفزيون.. ساعة بالاخبار وساعة
بلعبة كرة قدم مدري لمين.. وساعة ببرنامج ثقافي وساعة بغنيي لمطربتو المفضلة وساعة
مش مهم بشو المهم بشي يلهيه عنك.. بتتذكري موقف مضحك صار معك بالنهار بيجي ببالك
تمرقيه بين الدعايات.. بتقوليله: حبيبي اليوم صار معي شي فضيع وأنا عم إقطع الشارع
... وبتسكتي بتطلعي في بتلاقيه مش سامعك ولا كإنك موجودة.. بتروحي تنامي وبتخليه
ياخذ راحته.. اصلا ما بينتبه إنك فليتي ..
بس يخلص مسلسل البرامج تبعو بيجي وش الصبح عغرفة نومكن بيبلش يدلع فيكي.. على
حبيبتي قومي.. حبيبتي بدك تنامي؟ يعني وحدي بغرفة النوم الساعة 2 الصبح عالتخت
متغطيي ومغمضا عيونها وعمتشخر ومش حاسة بشي حواليها يعني شو ممكن تكون عمتساوي؟
معقول بدها تنام؟ مهي نايمي من 6 ساعات.
يعني كل النهار وانتي عمتغزلي حواليه من اليمين ومن الشمال عمتحاكيه وتتمايلي قدامه
وهوي مش منتبهلك معقول يعني انتبهلك وانتي نايمه بس اسا فطن انك موجودة؟ معقول
هالرجال ما بيشوف غير بالعتمة؟
بتفيقي الصبح بتعمليلو فطور وبتفيقيه بتقعدو بتتروقو وما شالله وكان عنكن..
بتقوليله: حبيبي اجت فاتورة الكهربا. بيقلك هوهو علينا على هالسيري لازم تنزعيلي
كيفي عالصبح؟
بتتصلي في عشغلو بتقوليله: حبيبي شو منشان الكهربا. بيصرخ فيكي بيقلك: اني بالشغل
مش فاضي اسا..
بيجي من الشغل بتقوليلو: صار معك شي؟ بيطلع فيكي وهوي معصب كإنك قاتلتيله بيو بيقلك:
جاي تعبان من الشغل هالموضوع مش اسا بيفتحو اجليه لغير وقت..
بعد ما يتعشا بتعمليلو فنجان قهوة منشان يروق أعصابو وبترجعي وانتي خايفي بتقولي:
حبيبي ما بيسوا نتأخر أكثر عالكهربا.. بيصرخ فيكي بيقلك: يعني الواحد ما بيعرف يدخن
سيجارة عرواق.. لك حتى فنجان القهوة ما بتخلينا نستمتع في؟
وقبل النوم بترجعي بتفاتحي بالموضوع بيقلك: يعني الواحد منا نعسان وبدو ينام ما
بيصير تسكتي قبل النوم لازم تنزعيلو كيفو؟
بتحتاري امتا بدك تحاكيه.. والا ثاني يوم بجي من شغلو بيلاقي المجلس قاطع الكهربا
عن البيت بيعصب وبيقاتل وبيبلش يصييح عليكي ويقلك: يعني شو قاعدي حضرتك عمتعملي كل
النهار بالبيت ليش ما بتحكي مشان نطلع ندفع ؟ يعني لازم تستني ليقطعو الكهربا؟
الصبح مش رايق وبالشغل تعبان وبالسهرة مش فاضي وبالليل نعسان عطينا وقت يلايم معك
لنحاكيك يا بعدي..
واوقات بيكونو هالولاد عميلعبو ومبسوطين ويا عيني عليهن بيصرخ هالبي فيكي : لك سكتي
ولادك ليش هيك فايعين تعبان هدولي بالي اصلا ولادك بدهن يجننوني.. وكإن هالولاد
ولادك لحالك مطالعتيهن معك بجهازك.
ولما بتحبي تطلعي تسهري منشان تتحدثي انتي واياه اسمو مش عبصرلكن تقعدو بالبيت
بيقلك: زوج اختك ما بطيقو.. زوج رفيقتك ما بحبو.. اليوم تعبان.. مو جاي عبالي ..
وكم حجية من إياهن منشان ما يروح.. والا فجأة بيرن تلفونو بينط متل الأرنب ولا كإن
بيو شي بيلبس ثيابو عالسريع وبيفل.. لوين؟ الله اعلم..
ويا ويلك تتصلي تسأليه وينك..: شو مخابرات؟ أنا امي ما كانت تسألني وين رايح ولا
وين جايي.. جاي انتي تتحكمي فيني؟
وإن صار وشي يوم اجا عبالو يطالعك يسهرك برا.. كل السهرة ما بحط نظرو عليكي.. بيظلو
عيونو عميتلفتو يمين وشمال ووين في صبيي حلوة لاحقها ووين في لبس قصير متابعو وانتي
لحالك قاعدي حدو وهوي مش معبرك.. واذا صار ولقح نظر شي واحد عليكي بيعملك جرصة..
واذا اجا عبالك ترقصي بيقوم معك وهوي عاملك منيحة بيرقص وهوي شايف كل البنات قبالو
والك بالذات مش شايفك.. عميتلفت حواليه ويرقص قبالهن ورقصو متناغم مع رقصاتهن وانتي
عمترقصي متل يلي مضييع الايقاع.. عمترقص وتبلعي غضبك..
ولما تفلو عالبيت بتقيليلو: لما ما بدك تعبرني كل السهرة ليش تاخذني؟ ولما حضرتك
رايح منشان الثانيات شو بدك فيني خليني بالبيت حد ولادي اشرفلي..
وهوي لانو ما عندو جواب بيبلش يصييح بكلام مش مفهوم وبيطب وبينام وبيحرم ياخذك
مشوار.. على اساس انتي مستقتلي لتطلعي معو يعني..
ولما بتكونو رايقين ولولاد نايمين.. وسهرانين عضو الشموع وجو رومانسي عالاخر..
وموسيقى هاديي..بيحضنك.. بيدلع فيكي ..وحكي حلو بيحاكيكي وبيحن عليكي وبيحسسك كإنك
ملكة.. هوي ملاك.. فجأة بيدفشك هيك عنو بسرعة وبيطلع بساعتو وبيشهق.. هييييي صارت
الساعة 12؟!! يا صبحان الله عنجد؟ يعني قبل ساعة كانت 5 الظهر ؟
بيقفز هيك بسرعة بيغسل بيلبس اواعيه وببوسك بوسة اعتذار وبيطب وبينام.. وانتي
بتتسائلي بينك وبين حالك: هوي كل ليلي بيسهر للساعة 2 واليوم لانو نحنا رايقين لازم
ينام بكير؟..
وانو بيرجع هالرجال بيقلك: ليش بتظلي قالبي خلقتك..ليش معصبه.. ليش هيك مبهدله حالك..
ليش عبتنامي بكير.. ليش متغيره معي.. وبيصير يقاتل مع حالو.. أنا شو مقصر معك.. كل
شي مقدملك.. بيت.. سيارة.. معاش اخر الشهر.. وشوية ديون مع الوقت بيخلصو انا هذا
الموجود عندي واذا مو عاجبك روحي عند اهلك.. لنشوف شو بدهن يقدمولك. وانتي ساكتي
عمتتسمعي عليه.. أما عنجد!! غريب أمرك يا هالرجال..