من أين لك هذا؟
مستعبط - اسم مستعار* - 30\03\2013
كل مرة بتفتح فيها بريدك الالكتروني وتلاقي علامة من 1 لـ 9 او اكثر رسائل غير مقروءة.. بشعشعو عيونك وبتبتسم يا ضرسان، أنجق لو ربحان باللوتو.. بس يا ترى بس تحمل المفتاح وتروح تفتح صندوق البريد تبعك.. ليش بيرجفو إيديك وما بتعرف تحط المفتاح بالغال لتقلبو مرتين وتلاثي؟
أني بقلك ليش..
لإنو مستحيل تروح تفحص البريد وما تلاقي مكتوب مستنيك.. وشو مكاتيب!! لك أي غرام يا زلمي..
عد لقلك..
فاتورة الكهربا والأرنونة، فاتورة بيزك، فاتورة البلفون وجديد في مجدل شمس فاتورة المي عفكرة متعوب عالعتسوف تبعها يعني ما بتخوّف طبعا طول مانت بعيد عن المبلغ..
منتابع.. ضريبة التلفزيون، ورقة من محامي بخصوص محكمة من شي 14 سني ولاول مرة بتسمع فيها.. مخالفة سير متراكمة ومتضاعفي عشرات المرات كونك ما دفعتها.. تدبيس من البنك بيذكرك انو فوق كل الخيوفيم يلي عليك هذا الشهر عندك شي اسمو ريبيت على مسكيرت.. ورقة من كرتيس اشراي بتذكرك بالمبلغ يلي صرت ساحبو وشو بقيلك من المسكيرت.. ورقة التست تبع السيارة، مكتوب ثاني من مكتب التأمين.. ورقة من بيتوّح ليؤومي ورقة من بنك مزرحي تفخوت بخصوص المشكنتة يلي اخذها.. مكتوب من المستشفى فيو نتيجة فحص عملتو من شي نص شهر.. وفاتورة من نجمة داوود الحمراء لانك سخنت مرة ونقلوك بسيارة الاسعاف..
وبالآخر بزينولك الفاتورة " يدفع قبل تاريخ:.........."
هذا غير الفواتير والاوراق يلي بتوصلك والي ما بتفهم عن شو عميحكو ولا بتسترجي تفتحهن..
وبتيجيك اخر الشهر القبضة..
تلوش اربع الآلاف للرجل.. والمرأة عاطلة عن العمل..
بدك تدفع 1700 شيكل للمشكنطة..
1000 شيكل قسط هلفئة.
500 شيكل بنزين.." عبحكيكن عالباب الواطي"
فاتورة المي 100شيكل
فاتورة الكهربا 500شيكل "الحكي بفصل الشتا"
بيلفون 400شيكل
بيزك 76شيكل "كثر خير بيزك يلي عملت مسلول جديد أرخص"
شيكات 2000شيكل
مصروف الماكولت"1500شيكل وهون عبحكي عن العائلي يلي ما بتاكل وبتشرب بس بتذوق"
صيدلية 100 شيكل "هو الأشخاص عندهن مناعة ما بيصخنو"
ثياب للولاد 200شيكل
مصروف غاز 100شيكل..
حطب 2000شيكل..
جمعيات شي 600 شيكل..
يعني لا تواخذوني بدي كثر غلبي واسأل.. واحد تلوشو 4000 شيكل..
كيف عبيدفع كل هالمبالغ؟
يعني اني يلي بعتبر حالي غشيم بأمور الدولي وقوانينها ما قدرت استوعب.. كيف موظف الدولة المتعلم استوعبها؟.