مبالغة.. حد التطرف
ايتاليكا - 25\11\2013
بعتذر تأخرت عليكن... وبعتذر كمان انو مش رح اتحفكن هالمرة بحلقة جديدي من سلسلة
خياني مدروسي ونتائج معكوسي..
الله وكيلكن يا جماعة الخير عقد مسمعت تعليقات وسمعت تحليلات ونقاشات عن كاتبة مقال
"واضح للعيان".. انو قصدها هيك.. ولا كان قصدها هيك...
وتهجم وانتقادات بين مؤيد ومعارض بعيدا عن السياسة.. شككوني بحالي... رجعت قريت
المقال يجي شي 10 مرات بدون مبالغة..
وحابي وضح الصورة الحقيقية لكل الأشخاص يلي حاولو يشرحولي قصدي بالمقال يلي اني
كتبتو.. بس مشان ما تتعبو حالكن بتحليل كلام بالأساس محلل... رجعولي عالمقال
وقوليلي أنا وين ذكرت كلمة فقر أوفقير!!؟
مين منا مش عبمر أو مر بضائقة مادية لسبب من الأسباب.. سوء تخطيط.. طرد من عمل..
انكسر بشغلي.. انسرقلو شي... فتح مشروع ببيتو عأساس بيكلف شوي ومن هون شغلي ومن هون
شغلي كلفو المبلغ المرقوم يلي ما كان معمول حسابو.. عطلي بسبب الشتا والثلج.. عطلي
بسبب وفاة حدا بيخصوا وأسباب كثيري عمنواجها يوميا ؟
ولكن كم واحد بالبلد اضطرو يتركو شغلهن بسبب مرض صابهن فجأة.. بدك تقلي التأمين
الوطني بيدفع!؟
صحيح، بس لبينما يبلش التأمين يدفع بكون تسلمو انتو.. الدين اكل عيونو.. وتاع نقول
الله طلع بوشو وبعد كم شهر... بلش يقبض من التأمين.. قديش بدو يقبض!!؟ إذا بدنا
نعتمد عالتلوش تبعو يالله يكفو حق اكل وشرب.. طب وباقي المصاريف.. والخوفوت يلي
كانت عليه قبل المحنة!!؟
المشكلي الحقيقية يلي عايشينها بالبلد هي التمثيل.. مشان شو مش عارفي ولوين بدنا
نوصل كمان مش عارفي المهم نمثل انو كلنا بخير وعايشين بمستوى راقي وفوق فوق.. ونحنا
منفهمش من الرقي غير أيفون.. وأوسف برتي.. وانتيغو.. ونايك.. وأديداس.. وزارا وغولد
فيلد ومدري شو كمان...
وبس نقرا مقال عنوانو واضح للعيان منجن ومنقول مبالغ فيه.. وين المبالغة!؟
انو حدا يطلع يكسر المعتاد ويعترف بالعجز قدام متطلبات الحياة لأي سبب إنكان ويصرخ
بالحقيقة؟!
بينما النفاق والكذب يلي كل الوقت عمنمارسو باحتراف شديد التطرف مش مبالغة!!؟
اللي شاف انو الموضوع مبالغ في كيف عبيدعي يجي يواجهني.. ويواجه ابنو الصغير لما
بيكون عندو يوم مشترى صندويش وهوي ما معو 10 شيكل يعطيه اياها متلو متل رفقاتو..
يجي يواجهني لما يكون مش قادر يصرف روشيتة دوا من الصيدلية اللي عأساس كتبلو عليها
الدكتور قبل اسبوع ليتحسن.. وهوي عبيستتا وضعو المادي ليتحسن .. وبتقلي مبالغة!!؟
لما بتضطر تصرف شيك عند صراف لانو نقصك 1000 والشهر يلي بعدو 2000 لتغطي قيمة الشك
تبع الشهر الماضي بالاضافي لشك مكتوب من قبل والشهر يلي وراه 3000 وهلمو ما جرا..
وكلو مشان شو!؟ مشان ما حدا يقول عني فقير!؟
ولكن الغني مش يلي عندو كثير أشياء.. الغني يلي معلهوش وﻻ حبة دين.. حتى لو معندوش
شي.. وبتقلي مبالغة!!
الله لا يذوقكن هالكاس.. بس حاجي تقلي مبالغة..
ومع هيك أني بعترفلك وبقلك في مبالغة ما الها حدود بالبذخ والصرف والتبذير اللي ما
الو طعمي.. بالوقت يلي الدين آكل قلبنا من جوا.. وفيك تسأل صحابين المصالح بيحكولك..
ولما قلت بتطلع عشغلك ب1500 شيكل فقط ما قصدت الرجال.. لانو الرجل بكل الأحوال تارك
ولادو ومش هامو منهن لانو بتربيتنا ما شالله علمو الرجال انو لوﻻد مسؤولية امهم
وانحرمو من لذة التربية والرابط الأسري المقدس.. أما شو بعمل بلغة دعمت الذكور
وخلتنا نتحدث بصيغة المذكر حتى لو كان في الاف النساء ورجل واحد!! بدكن هون ترجعو
كثير بالزمن لتحاسبو المسؤول الحقيقي عن اللغة مش أني..
وبترجع كثير أسئلة براسي.. طب نحنا لوين بدنا نوصل.. وكيف!؟ ولإيمتا فينا نخفي
الحقيقة عن الوجوه..
لما تلاقيلي جواب..
قلي ساعتها مبالغة..
