تحدثت أخصائية التغذية روز عويدات عن مشروب “المتّة” وقيمته الغذائية العالية والأوقات الأنسب لشربه، وذلك في فيديو شيق نشرته عبر حسابها على تطبيق “إنستغرام”. وقدمت خلاله مجموعة من النصائح القيمة والإرشادات الصحية لعشاق المتة، مسلطة الضوء على كيفية الاستفادة من خصائصه دون التأثير سلباً على جودة النوم أو صحة الجهاز الهضمي.
إعلان
إعلان
إعلان
إعلان
إعلان
إعلان
إعلان
إعلان
إعلان
إعلان
تقول روز:
مشروب المتّة.. محبوب الجماهير في الجولان.
نحنا يا جماعة، إذا وجعنا راسنا منشرب متّة، إذا بدنا نجتمع منشرب متّة، وإذا بدنا ننبسط ونقعد هيك، نعمللنا جلسة كمان منشرب متّة.
تخيّلوا، حتى بس نسافر، مناخذ معنا قرعة المتّة.. وسلّة المتّة كل الوقت بالسيارة. بلكي يجي عبالنا نقعد على جانب الطريق ونشرب كاسة متّة.
طيب، شو هي فوائد المتّة؟
أول شيء، المتّة بتحتوي على مضادات أكسدة، ومضادات الأكسدة بتعزز جهاز المناعة وتقلل من الالتهابات.
ثانيًا، تحتوي على كمية كافيين عالية، والكافيين بزيد النشاط وبزيد التركيز. وفي اليوم أبحاث بتقول إنه منيح ناخذه قبل الرياضة، لأنه بيحسّن من الأداء الرياضي.
فالمتّة تحتوي على الكافيين، ولازم ننتبه لكمية الكافيين على مدار اليوم. يعني لا يسمح لنا ناخذ اكثر من 300–400 ميليغرام كافيين باليوم.
إيمتى منشرب المتّة؟
لأنه بتحتوي على كمية كافيين كبيرة، يُفضّل شرب المتّة بعد ساعة إلى ساعة ونص من لما نقوم.
ليش؟
لأنه بيكون هرمون الكورتيزول عالي على الصبح، والكافيين بعليه بالزيادة، فيُفضّل إنه نستنى شوي لحتى نشرب المتّة.
وبالذات اللي عندهم أوجاع معدة أو عندهم إحساس بالحرقة، يُفضّل مش دغري يشربوا الكافيين على معدة فارغة.
والشغلة الثانية، كثير بعاداتنا منشرب المتّة بالسهرة. وبالسهرة نحنا المفروض ينزل هرمون الكورتيزول عشان يعلى هرمون الميلاتونين، اللي هو هرمون النوم، عشان نفوت بنوم عميق.
فشو بيصير؟ نحنا منشرب المتّة بالسهرة، وفي ناس بتقلق وبتبطل تقدر تنام. فهذا من كمية الكافيين العالية الموجودة بالمتّة.
ففينا نقلل من كمية الكافيين، أو إنه آخر مرة نشرب الكافيين تكون قبل 6–8 ساعات من النوم.
تخيلوا قديش لازم يكون في وقت!
في ناس بتقولي: “أنا بشرب كافيين، بحط راسي عالمخدة وبنام.”
بس ما منفتش بنوم عميق، وبيقوموا على الصبح وبيقولوا: “أنا مش كثير شبعت نوم الليلة”، أو “حسيت حالي فيق، مش كثير مرتاح، مش كثير هيك مزاجي رايق”.
فهذا الشي لأنه نحنا ما مننام نوم عميق.
فيُفضّل قدر الإمكان، وبعرف إنه مرات صعب علينا شوي إنه ما نشربش متّة بالليل، بالذات إذا بيجينا سهارة أو بيجينا ضيف، بس فينا نستبدل المتّة بمشروب ثاني.
ممكن يكون زهورات، ممكن يكون بابونج، ممكن يكون زعتر وقرفة، أي مشروب عشبي بتحبوه ولا يحتوي على الكافيين.
فنصيحتي:
إذا بدكم تشربوا متّة، اشربوا أكثر بساعات النهار أو بالصبح بعد ما تفيقوا بشي ساعة.
وخبروني شو بتحسوا.
نهاركم سعيد.
