يا وجع روحي – زهرة نيسان

زهرة نيسان – يا وجع روخي

يا وجع قلبي قلي بشو أخطيت بحقك..

تزرعت الوجع ورسمت نهايتي بخطك..

يا دفا روحي من وين جبت قسوتك..

كيف طاوعك قلبك.. تغمس السكين جوات روح الروح وتنتزع فرحة عفرقتك بس انها انتحرت..

يا ضو القناديل.. كيف ألمح طيفك والعتم عزف عوتر حساس تيخطف الإحساس اللما عاد إلو لزوم عغيابك..

يا بردي.. يا مين يغطيه.. يا ناري يا مين يطفيه..

يا دمعة كل منشفت مطرت عجديد والسيل يجرف الحنية وبطريقو ياخذ فكرة قبل منضجت عغصن حبك قطفها خريفك ورماها بطريقي بلية..

يا قلب مذبوح.. يا صوت مبحوح… يا آخ من جوا الصدر تطلع وما تعرف لوين تروح…

يا وجع الوجع.. خبرني كيف كان بدوني يومك…؟

عميوجعك قلبك.!؟. متل مالصقيع عصف عقلبي وثلج الإحساس ذكرى كل معنت عالبال شكت السهم ومن روح القلب من جوا نزف بركان دافي متل حبك وبارد متل حظي اللما بالحظ إلو مطرح!؟..

يا حب خبرني…

ترا إنت هيك مشوه؟ واﻻ عقد معذبوها وهطل ملح دمعها عليك.. تحللت وبقيت متل قلبها مش عارف شو هوي ذنبك.. تتدفع ثمن خطايا ما إلك فيها غير إنهن استعارو منك الإسم وقصقصوه عباية من دون قياس وقصقصو جناحاتها تما تعرف تطير وتلحق بثارك وثارها تلحق..

يا حب وينك.. ليش ما قلتلي إنك ضعيف متلي قبل مفيك احتميت.. وما رميتني برمح يبعدني عن طريق ملياني مطبات قبل مأوقع بوادي.. وشو وادي مليان ذياب.. ينهشو بالقلب بالروح بالفكر حتى ويرموك بقايا انسان كان مرة عليك يتغذا..

ليش يا حب.. تركتني لقمي سهلي.. بعد مفيك احتميت…؟

قلي يا حب بحقك أني بشو أخطيت..